Marty nuk kandidon më!

Dick Marty, me moskandidimin e tij në Dhomën e Kantoneve, nuk do të jetë më as në Këshillin e Evropës në legjislaturën e ardhshme

Dick Marty, politikani kontrovers i Zvicrës, i bëerë së fundi i njohur me raportin për „trafikimin e organeve”, ka vendosur që të mos kandidojë më në mandatin e ardhshëm për postin e deputetit të Dhomës së kantoneve të Parlamentit Nacional të Zvicrës. Marty ka përfaqësuar kantonin e Tesinës për FDP-në (Partinë Liberale) në këtë dhomë pa ndërprerje, duke filluar nga viti 1995, që d.t.th. plot 4 mandate.

Në bazë të kësaj pozite, ai është zgjedhur edhe deputet në Këshillin e Evropës.

Dega e FDP-së për kantonin e Tesinës është njoftuar me shkrim nga Marty për moskandidimin e tij të mëtejmë. Duke iu përgjigur vullnetit të tij të shprehur, një kuvend i FDP-së, i mbledhur të enjten ka vendosur të mos e kandidojë më Martyn për postin e deputetit.

Duke qenë se Marty nuk ndodhej në Zvicër ditën kur u publikua njoftimi, mediet zvicerane nuk kanë pasur mundësi të marrin qëndrimin e tij lidhur me moskandidimin.

Ajo që dihet është se, duke qenë që posti në Dhomën e Kantoneve është bazë prej të cilës dalin kandidaturat për vendin e deputetit në Këshillin e Evropës, Dick Marty, me moskandidimin e tij, nuk do të jetë më as në Këshillin e Evropës në legjislaturën e ardhshme.

Nëse mund të kuptohet kjo si tërheqje e tij nga jeta aktive politike, mbetet të pritet prononcimi i tij.