Maqedonia e Serbia, pikëpamje të ndryshme për Kosovën

Nuk ka asnjë afrim qëndrimesh në mes të dy vendeve për Kosovën, por kjo nuk dëmton bashkëpunimin Maqedoni-Serbi

Presidenti i Maqedonisë, Gjorgje Ivanov në Beograd është takuar me homologun e tij serb, Boris Tadiq.

Ky takim rikonfirmoi se mes dy vendeve nuk kishte asnjë afrim qëndrimesh për Kosovën, por kjo në asnjë rast, nuk do ta pengojë Serbinë dhe Maqedoninë të bashkëpunojnë për realizimin e objektivave të përbashkëta, raporton agjencia e lajmeve INA.

“Pozicionet e ndryshme lidhur me Kosovën dhe çështja kishtare nuk janë dhe nuk guxojnë të jenë pengesë për zhvillimin e bashkëpunimit të ndërsjellë mes Maqedonisë dhe Serbisë”, kanë konkluduar presidentët e dy shteteve.

Nikoqir i samitit të sivjetëm të UNESCO-s është presidenti serb, Boris Tadiq, ndërsa në të po marrin pjesë të gjithë presidentët e Evropës Juglindore, me përjashtim të Kosovës.

Kjo konferencë ka të bëjë me ripajtimin dhe trashëgiminë, ndërsa presidentët do të mundohen të dërgojnë një mesazh për bashkëjetesën dhe ripajtimin e popujve të rajonit.