Limaj duhet të paraqitet në prokurori

Ish-ministri i Transportit, Fatmir Limaj, është ftuar të paraqitet para prokurove të EULEX-it më 20 shtator të këtij viti

Ish-ministri i Transportit dhe Postë-Telekomunikacionit, Fatmir Limaj, është ftuar të paraqitet para prokurove të EULEX-it më 20 shtator të këtij viti lidhur me dyshimet për korrupsion në kohën kur po drejtonte ministrinë në fjalë.

Kërkesa e misionit evropian për sundim të ligjit vjen rreth 15 muaj pas bastisjeve që iu patën bërë ministrisë së Transportit dhe Postë-Telekomunikacionit dhe disa banesave private të personave nga kjo ministri, për shkak të dyshimeve për korrupsion në dhënien e disa tenderëve.

Avokati mbrojtës i Limajt, Tomë Gashi, e quajti të vonuar ftesën e prokurorisë së EULEX-it, vonesë kjo e cila, sipas tij, është bërë për të dëmtuar qëllimisht imazhin dhe kredibilitetin e klientit të tij, njofton radio Evropa e Lirë.

Ai shprehu bindjen se ftesa drejtuar Limajt hyn në kuadër të një, siç e quajti ai, fushate mediale të EULEX-it.Mirëpo, në EULEX nuk deshën ta komentojnë këtë çështje.

Përveç dyshimeve për korrupsion mbi deputetin Fatmir Limaj, rëndojnë dhe dyshimet për krime lufte në fshatin Kleçkë.