Kuvendi shpërfillë Vetëvendosjen për bisedimet me Serbinë

Megjithatë Qeveria obligohet të informojë çdo tre muaj Kuvendin për përpjekjet e saj për kontroll në tërë territorin e Kosovës

Dështoi mocioni i ngritur në Kuvend nga Lëvizja Vetëvendosje për ndërprerjen e bisedimeve me Serbinë. Për mocionin votuan 21 deputetë, pesë abstenuan, ndërsa kundër ndërprerjes së bisedimeve votuan 56 deputetë.

Por, kjo nismë e kësaj partie opozitare nuk shkoi huq, ngase deputetët miratuan pikën e dytë të mocionit, që i kërkon Qeverisë të ndërmarrë hapa konkretë për të shtrirë autoritetin e shtetit të Kosovës në të gjithë territorin e saj, veçanërisht në veri. 　

Po ashtu është miratuar edhe pika e tretë e mocionit të Vetëvendosjes, që thotë se “Qeveria e Kosovës të informojë rregullisht, çdo tre muaj, Kuvendin e Kosovës për përpjekjet e saj për të vendosur kontroll në tërë territorin e Kosovës.

Ndërkohë Vetëvendosje kishte thirrur në interpelancë kryeministrin Hashim Thaçi lidhur me bisedimet me Serbinë.

Deputeti i Vetëvendosjes, Albin Kurti ka thënë se nga dialogu i nisur ndërmjet Serbisë e Kosovës, Serbia do të fitojë statusin e kandidatit për BE, kurse Kosova kopjet e librave të kadastrit dhe të librave amëz. Kurti kërkoi ndërprerjen e bisedimeve dhe për pasojë edhe përgjegjësinë Hashim Thaçit.

Duke iu përgjigjur akuzave të Vetëvendosjes, kryeministri Thaçi tha se në bisedime me Serbinë për zgjidhjen e çështjeve teknike, në të mirë të përmirësimit të jetës së të gjithë qytetarëve të Kosovës, është hyrë me platformë dhe me qëllim të shtrirjes së pushtetit në gjithë territorin e vendit.

Thaçi akuzoi Vetëvendosjen për qëndrime kundër miqve perëndimorë–SHBA dhe BE-së, duke shtuar se ai dhe qeveria që drejton kanë vijat e kuqe të përkushtimit.