Kosova

Kurti u takua virtualisht me studentë të Kolegjit Universitar të Amsterdamit

Gjatë bisedës, ata u njoftuan mbi prioritetet e qeverisë dhe punën e saj të deritanishme

Kryeministri i Republikës së Kosovës, Albin Kurti, në mbrëmje zhvilloi një bisedë me studentë të profileve të ndryshme nga Kolegji Universitar i Amsterdamit.

Prof. Anne de Graaf, për vite me radhë organizon vizita studimore në Kosovë, ku studentë ndërkombëtarë mësojnë rreth vendit tonë dhe për këndvështrime të ndryshme sociale, politike dhe kulturore.

“Gjatë bisedës, ata u njoftuan mbi prioritetet e qeverisë dhe punën e saj të deritanishme, politikat progresiste dhe synimet për reforma të domosdoshme në drejtësi, ekonomi, edukim e shëndetësi”.

“Kryeministri Kurti vuri theksin tek planet e qeverisë për rritjen e punësimit te të rinjtë dhe gratë, dhe lidhshmërinë në mes edukimit profesional dhe tregut të punës. Studentët shfaqën interesim në lidhje me menaxhimin e pandemisë, vizionin e qeverisë për integrim evropian dhe bashkëpunim rajonal, dhe përvojën e Kurtit si aktivist politik”, thuhet mes tjerash në komunikatë.

Në fund, bëhet e ditur se Kurti u uroi studentëve suksese gjatë studimeve dhe i falënderoi për interesimin që ata kanë për Republikën e Kosovës.