Kosova po voton

Komisioni Qendror i Zgjedhjeve në konferencën e parë që mbajti në mëngjes tha se procesi ka filluar mbarë, pa asnjë vonesë dhe po mbahet në gjithë Kosovën

Në orën 7 e mëngjesit janë hapur të gjitha vendvotimet në Kosovë, ku pritet të zgjidhen 120 deputetët e rinj të Kuvendit të Kosovës. Komisioni Qendror i Zgjedhjeve në konferencën e parë që mbajti në mëngjes tha se procesi ka filluar mbarë, pa asnjë vonesë dhe po mbahet në gjithë Kosovën.

Kryetarja e KQZ-së, Valdete Daka, u bëri thirrje të gjithë qytetarëve me të drejtë vote që të dalin në këto zgjedhje.

“Në Listën Përfundimtare të Votuesve janë 1 milion e 782 mijë e 454 emra të personave që kanë të drejtën e votës, ta ndarë në 798 Qendra të Votimit me gjithsej 2 mijë e 374 vendvotime”, theksoi Daka.

Ndërsa menjëherë në mëngjes kanë votuar edhe disa nga liderët partiak.

Kryetari i Lidhjes Demokratike të Kosovës, Isa Mustafa votoi në Shkollën Fillore “Emin Dukraku” në Prishtinë. Ai ka bërë thirrje për zgjedhje të qeta e demokratike dhe që qytetarët të dalin në zgjedhje për të votuar. Ai ka uruar që rezultatet e zgjedhjeve të demokratike, fer dhe të lira.

Ndërsa kryetari i Aleancës për Ardhmërinë e Kosovës, Ramush Haradinaj ka votuar në Shkollën e Mjekësisë, Ali Sokoli. Ai i ftoi të gjithë qytetarët e Kosovës që të dalin të votojnë. Haradinaj tha se vetë vendosim për të ardhmen e Kosovë, prandaj votimi, sipas tij, ka rëndësi të madhe.

Edhe prokurorja e Shtetit, Laura Pula dhe zëdhënësi i policisë, Baki Kelani në një konferencë për media, kanë thënë se deri më tani në të gjitha vendvotimet nuk është shënuar asnjë incident. Ata thënë se vetëm në një rast në Prizren një qytetare është penguar të votoj, por edhe ai problem ka kaluar.