Kosova po ngec

Revista londineze The Economist, në numrin e fundit, në një shkrim të saj, vlerëson aktualiteti politik në Kosovë, duke u ndal te kompleksi ekonomik i Trepçës, i cili tani është shndërruar në një metaforë.

Pasi konstaton se Kosova ka pasur një dëm të madh për shkak të manipulimit të zgjedhjeve dhe akuzave të Dick Martyt, The Economist vlerëson se Kosova ngadalë po mbetet prapa zhvillimit të vendeve fqinje.

Sipas revistës, me shpejtësi të ndryshme, shumica e vendeve të Ballkanit perëndimor po bëjnë përparim politik dhe ekonomik. Por, Kosova ka mbetur keq prapa. “Kosovarët tani janë të vetmit në rajon që ende kanë nevojë për viza për të udhëtuar në 25 vendet e zonës së Shengenit të Evropës. Ata janë edhe më të varfrit. Si gjithmonë, njerëzit e thjeshtë vuajnë më shumë”, shkruan The Economist.

Ndërsa lidhur për kompleksin ekonomik Trepça, The Economist potencon se gjendja aktuale e këtij gjiganti të dikurshëm ekonomik, është një pasqyrë tragjike.

“Më shumë se një minierë, Trepça tani është një metaforë. Në vitin 1970 kompleksi i minierave të Trepçës kishte të punësuar 23.000 vetë. Dikur Trepça përbënte rreth 70 për qind të mineralit që nxirrej nga toka në gjithë ish-Jugosllavinë. Sot, ndërkaq kjo minierë është një gjigant i rraskapitur, në prag të kolapsit total”.

Sipas revistës, për kosovarët, Trepça përfaqëson shumë më tepër se një minierë, ajo është si një metaforë për fatin e Kosovës. Një burim i pasurisë, por edhe i ndotjes së mjedisit në vitet socialiste të Titos.

“Në vitet e regjimit të Milosevicit ajo ishte një arenë e protestave kundër tij. Trepça, sot, është gjithashtu një nga shembujt më të mirë të kompleksitetit që rrethon ndarjen e Mitrovicës, ku shqiptarët në jug dhe serbët në veri punojnë në një sipërmarrje që sot ka vetëm hijen nga ajo që ishte dikur”, shkruan kjo revisatë prestigjioze londineze.