Kosova njeh Këshillin Kombëtar të Libisë

Ministri i Punëve të Jashtme Enver Hoxhaj, i ka dërguar një letër kryetarit të Këshillit Kombëtar të Libisë, Mahmud Xhibril

Në emër të Qeverisë së Kosovës, ministri i Punëve të Jashtme Enver Hoxhaj, i ka dërguar një letër kryetarit të Këshillit Kombëtar të Libisë, Mahmud Xhibril, përmes së cilës e ka njoftuar me vendimin që Kosova njeh zyrtarisht Këshillin Kombëtar të Libisë, si autoritetin e vetëm qeverisës në këtë shtet afrikan.

“Pas një udhëtimi të gjatë dhe përpjekjeve të shumta të popullit të Libisë, njohja e qeverisë tuaj, si organi i vetëm përfaqësues legjitim i popullit të Libisë, buron nga besimi dhe mirëkuptimi jonë se kjo Qeveri mund të udhëheq procesin për të ndërtuar një Libi të bashkuar, të lirë dhe demokratike, e bazuar në sundim të ligjit, në përputhje me standarde të larta të drejtave dhe lirive të njeriut”, thuhet në letër.

Ministri Hoxhaj shpreh bindjen se siguria e të gjithë libianëve do të garantohet, në mënyrë që të hapet një kapitull i ri i lirisë dhe drejtësisë.

“Jam i bindur se lidhjet miqësore dhe bashkëpunimi në mes të Republikës së Kosovës dhe Libisë do të thellohen në vitet që vijnë. Me këtë rast, shpreh propozimin e Qeverisë sime, që dy shtetet të vendosin marrëdhëniet diplomatike”, përfundon letra e ministrit Hoxhaj.

Këshilli Kombëtar i Libisë deri më tash është njohur nga shumica e vendeve perëndimore, ndërkohë që luftimet mes kryengritësve dhe trupave qeveritare të diktatorit Moamer El Gadaf po vazhdojnë.