Kosova eksporton produkte bujqësore në vendet e rajonit

OEK ka organizuar ceremoninë e nënshkrimit të kontratave për eksportin e produkteve bujqësore nga Kosova për në shtetet e rajonit

Në bazë të këtyre marrëveshjeve, do të mund të eksportohen produkte të Kosovës për në shtetet e rajonit, si në Shqipëri, Maqedoni, Mal të Zi deri në rreth 3 milionë euro.

Kryetari i OEK-ut, Safet Gërxhaliu ka deklaruar se kontratat e arritura do ta ndihmojnë prodhuesin vendor që patatet e tyre të mos prishën e të hidhen nëpër mbeturina, por ato të plasohen në tregun e vendeve të tjera dhe kështu të ndihmohet ekonomia kosovare si dhe zbutja e papunësisë në vend.

Sipas tij, sektori i bujqësisë do të kishte më shumë sukses dhe do të ndikonte edhe në rritjen ekonomike të Kosovës, sikur institucionet e vendit t’i stimulonin më shumë fermerët.

Kurse një ndër nënshkruesit e kontratës për marrjen e mallrave të Kosovës, Qazim Myzyri prej firmës “Frank PDA – 07” nga Shqipëria, u shpreh shumë i kënaqur që ka gjetur një partneritet të mirë me firmat e Kosovës.

Fillimisht është ndërmarrja “Agrovin”, e cila do të eksportoj 11.000 ton patate dhe 5.000 ton qepë për partnerët nga Shqipëria. 

Marrëveshje për shkëmbim tregtar përveç me firmat nga Shqipëria, Maqedonia dhe Mali i Zi, kompania “Agrovin” nga Pestova e Vushtrrisë kishte paraparë të bënte edhe me disa përfaqësues nga Serbia, por këta të fundit nuk janë paraqitur.