Kosova e Shqipëria me plane të reja të bashkëpunimit ekonomik

Rrethanat e reja të krijuara ndërmjet Kosovës dhe Shqipërisë, me vendosjen e reciprocitetit për mallrat serbe, mund të sjellin marrëdhënie të re ekonomike midis Tiranës dhe Prishtinës.

Ministri i Zhvillimit Ekonomik të Kosovës, Besim Beqaj, në takim me kryeministrin Sali Berisha paraqiti një plan të ri zhvillimi. Ai foli për situatën ekonomike në të cilën ndodhet Kosova dhe proceset e privatizimit të sektorëve strategjikë të telefonisë dhe energjisë. 

“Me kushtet e reja të krijuara, bashkëpunimi  i sektorit privat të dy vendeve ka mundësi  të rritet edhe  më shumë, nga shfrytëzimi i hapësirës së krijuar nga ndalimi i produkteve serbe. Nxitja e bashkëpunimit  duhet të synojë si fushën e investimeve ashtu edhe atë tregtare”, ka thënë Beqaj. 

Ministri kosovar është ndalur konkretisht te bashkëpunimi në fushën e energjisë, si një sektor me prioritet për Qeverinë e Kosovës. 

Nga ana e tij, kryeministri Sali Berisha vlerësoi vendimet e rëndësishme të Qeverisë së Kosovës në lidhje me privatizimet në fushat strategjike, të cilat përbëjnë dhe bazën e reformave themelore ekonomike.

Ai i quajti këto vendime të guximshme si shumë të rëndësishme për zhvillimin e shpejtë ekonomik të Kosovës duke iu referuar shembullit të Qeverisë së Shqipërisë, e cila falë privatizimeve arriti të ngrejë të ardhurat për frymë nga 204 dollarë në 1992, në rreth 800 dollarë sot.