Konfuzion rreth migracionit

70 % mendojnë se po të mos kishte ardhje të të huajve, në Zvicra do të kishte mungesë personeli por 62% janë për kufizimin e ardhjeve nga BE

Në sondazhin (barometrin) e publikuar të premten lidhur me preferencat politike dhe partiake të zviceranëve është përfshirë edhe qëndrimi i tyre lidhur me politikën e migracionit.

Të anketuarit kanë mendime të ndryshme për këtë problematikë mirëpo 70 për qind të tyre mendojnë se po të mos kishte ardhje të të huajve, Zvicra do të vuante nga mungesa e personelit, në shumicën e fushave.

Në të njëjtën kohë, 62% të të anketuarve janë të mendimit se duhet të kufizohet pranimi i të huajve nga vendet e Bashkimit Evropian, shkruan sf1.ch.

Qëndrimet lidhur me këtë çështje janë vlerësuar edhe duke iu referuar bazës partiake të pjesëmarrësve në sondazh. Kështu, 44% e të anketuarve me bazë partiake Partinë Socialdemokrate kanë qenë për kufizimin e përmendur.

Kjo shkallë e lartë e atyre që kërkojnë kufizim të ardhjeve dhe që njëherësh e pranojnë se pa të huaj do të ketë mungesë personeli sipas realizuesve të sondazhit nga gfs.bern tregon se në Zvicër nuk ka më ndarje të qartë në mes të kundërshtarëve dhe atyre që miratojnë ardhjen e të huajve në këtë vend.