Konfirmohet aktakuza në rastin Kleçka

Një gjykatës i EULEX-it e ka konfirmuar aktakuzën e ngritur për rastin Kleçka

Aktakuza është ngritur  ndaj dhjetë të pandehurve, në mesin e të cilëve është edhe nënkryetar i PDK-së dhe deputet i Kuvendit të Kosovës Fatmir Limaj.

Vendimi për ngritjen e aktakuzës është marrë më 26 gusht. Aktakuza është konfirmuar në tërësi kundër të pandehurve: Arben Krasniqi, Naser Krasniqi, Nexhmi Krasniqi, Behlul Limaj, Fatmir Limaj, Refki Mazrreku, Naser Shala, Sabit Shala, Shaban Shala, Besim Shurdhaj.

“Aktakuza i ngarkon të pandehurit në pika të ndryshme me akuza për kinse krime lufte kundër popullatës civile dhe robërve të luftës, që supozohet të jenë kryer nga fillimi i vitit 1999 deri në mesin e qershorit 1999 kundër civilëve serbë dhe shqiptarë, si dhe kundër pjesëtarëve të burgosurve të ushtrisë serbe dhe policëve serbë të mbajtur në një qendër të improvizuar paraburgimi nga Ushtria Çlirimtare e Kosovës e cila ndodhej në fshatin Kleçkë”, njofton Zyra e informacionit pranë EULEX-it.

Dhjetë të pandehurit në paraqitjen e tyre në gjykatë kanë hedhur poshtë akuzat me të cilat ata rëndohen.