KMDLNj kërkon sqarime për mosregjistrim të qytetarëve jashtë vendit

KMDLNj:"Nuk janë regjistruar qytetarët që jetojnë jashtë vendit dhe pasurit e paluajtshme që i kanë në Kosovë"

Këshilli për Mbrojtjen e të Drejtave e të Lirive të Njeriut në Prishtinë thotë se qytetarët që jetojnë jashtë Kosovës janë të diskriminuar me procesin e regjistrimit që ka filluar këtë muaj.

KMDLNj raporton se ka vërejtur këtyre ditëve që gjatë procesit të regjistrimit nuk janë regjistruar qytetarët e Kosovës që jetojnë jashtë vendit dhe pasurit e paluajtshme që i kanë në Kosovë, me gjithë deklarimet e familjarëve të tyre.

KMDLNj me këtë rast kërkon nga Komisioni Shtetëror i Regjistrimit dhe Enti i Statistikave të Kosovës që të japin sqarime se si do të regjistrohen personat apo qytetarët e Kosovës që përkohësisht punojnë jashtë vendit dhe si do të regjistrohen pronat e tyre në Kosovë?”, thuhet në një deklaratë të KMLDNJ-së.

Duke shtuar se KMDLNJ ka parasysh faktin që një pjesë e qytetarëve që jetojnë jashtë vendit nuk kanë qëndrim të përhershëm ne vendet ku jetojnë.

Po ashtu, një pjesë e madhe e tyre ndikojnë shumë në ekonomitë familjare në Kosovë. Pra, janë pjesëmarrës kryesorë në　 përcaktimin e kushteve socio-ekonomike të familjeve kosovare.

Sipas KMDLNj shqetësimet e qytetarëve janë legjitime dhe se në këtë rast diaspora po diskriminohet duke mos u trajtuar si qytetarët e Kosovës.

KMDLNj do t’i konsiderojë si jo të vlefshme rezultatet e regjistrimit nëse ky regjistrim nuk shtrihet në tërë territorin e Republikës së Kosovës dhe nëse në këtë regjistrim nuk përfshihen të gjithë qytetarët që përkohësisht jetojnë jashtë Kosovës”, thuhet në këtë deklaratë të KMLDNj-së.