KMDLNj-ja vë në pikëpyetje legjitimitetin e regjistrimit

Sipas KMLDNJ-së një ndër problemet e regjistrimit ishte lënia jashtë tij e familjarëve që nuk jetojnë në Kosovë

Pas publikimit të rezultateve preliminare të regjistrimit të popullsisë, ka reaguar Këshilli për Mbrojtjen e të Drejtave e të Lirive të Njeriut.

Përmes një komunikate, KMDLNj, ka vënë në pikëpyetje legjitimitetin e procesit, marrë parasysh që pjesa veriore nuk është përfshirë në regjistrim.

Gjithashtu, janë përmendur edhe parregullsitë, që sipas KMDLNj-së, e kanë përcjellë procesin që nga fillimi, si ankesat e qytetarëve për mos regjistrimin adekuat të familjarëve që janë jashtë vendit, por edhe lënien e tërësishme jashtë procesit të shumë qytetarëve nga regjistruesit.

“Mospërfshirja e të gjithë qytetarëve është shkelje elementare e të drejtave të njeriut,” thotë KMDLNj, ndërsa kërkon që institucionet përgjegjëse të rishikojnë dobësitë, dhe të fillojnë regjistrim të jashtëzakonshëm.

Ky regjistrim, është proces i dështuar dhe nuk pasqyron numrin real të popullsisë në Kosovës, dhe rezultatet e këtij regjistrimi, mund dhe do të prodhojnë pasoja politike, përfundon komunikata e KMDLNj-së.