Kërkohet mbështetje për prodhimet e vendit

Aleanca Kosovare e Bizneseve do të organizoi “Javën e Biznesit Kosovar”, me ç’rast do të promovohen produktet vendore

Komuniteti i biznesit edhe njëherë ka kërkuar nga qytetarët që vazhdojnë të konsumojnë produktet vendëse, sepse kjo do të ndikojë në zhvillimin e vendit. 

Drejtuesit e AKB-së, kanë shpalosur agjendën e “Javës së Biznesit Kosovar”, e cila pritet të hapet me 26 shtator, ndërsa do të përfundoj me 1 tetor. 

Slogani i këtij organizimi edhe këtë herë është “Unë konsumoj prodhime vendore. Po Ju?”. 

Kryetari i AKB-së, Agim Shahini ka thënë se kjo javë kërkon mbështetjen e gjithsecilit, duke shtuar se ekonomia e vendit, pas vendosjes së masave të reciprocitetit njohu një rritje të mirë. Por heqjen e këtyre masave, Shahini thotë që bizneset e Kosovës gjenden sërish në udhëkryq. 

Sipas tij, është vitale që qytetarët e Republikës së Kosovës të tregohen të matur në përzgjedhjen e produkteve, sepse siç ka thënë ai me konsumimin e produkteve vendore ndihmohet edhe buxheti i Kosovës. 

Nga ana tjetër zëvendësministri i Zhvillimit Ekonomik, Ramadan Hasani ka thënë se Qeveria e Kosovës është duke përkrahur biznesin vendës, në mënyrë që të krijoj një bazament të fort për zhvillimin ekonomik të vendit.