Kërkohet gatishmëri në rast të cënimit të sovranitetit

Këshilli i Sigurisë së Kosovës ka mbajtur mbledhjen urgjente, të ftuar nga kryeministri, Hashim Thaçi.

Këshilli i Sigurisë pas mbajtjes së mbledhjes doli me disa rekomandime, ndër të cilat kërkon nga të gjitha agjencitë e sigurisë së Republikës së Kosovës që të koordinojnë aktivitetet e tyre shumë ngushtë për të siguruar zbatimin e plotë të rendit dhe ligjit në tërë territorin e Republikës së Kosovës.

“Këshilli i Sigurisë së Kosovës konsideron se veprimet e agjencive shtetërore të sigurisë së Republikës së Kosovës në veri të vendit, për sigurimin e zbatimit të masave reciproke tregtare me Serbinë, si dhe vendosjen e sundimit të rendit dhe ligjit në atë pjesë të territorit të Kosovës, janë plotësisht legjitime dhe në përputhje me kushtetutën dhe ligjet në fuqi”, thuhet në komunikatëns e lësuar për media.

KSK-ja po ashtu rekomandon që agjencitë shtetërore të sigurisë së Kosovës, të koordinojnë veprimet e tyre me mekanizmat ndërkombëtarë, që janë prezent në Kosovë dhe që kanë kompetenca në fushën e sundimit të ligjit.

“Ky koordinim duhet të bëhet gjithmonë vetëm në përputhje me Kushtetutën dhe ligjet e Kosovës”, thekson Këshilli i Sigurisë së Kosovës.

Gjithashtu kërkohet që të koordinohen dhe të ndërmerren veprimet e domosdoshme që t’i dalin në ndihmë qytetarëve që jetojnë në veri të vendit.

Agjencitë Shtetërore të sigurisë së Kosovës, duhet po ashtu të koordinojnë veprimet e tyre me mekanizmat relevant ndërkombëtar për të zhbllokuar rrugët dhe për të siguruar lëvizjen e lirë për qytetarë dhe mallra. Sipas tyre, përderisa, nuk bëhen plotësisht të lira për qarkullim rrugët e bllokuara, duhet të hapen korridore të reja që mundësojnë furnizimin e qytetarëve më artikuj elementarë.

Këshilli i Sigurisë së Kosovës garanton qytetarët e Republikës së Kosovës se do të kryejë të gjitha obligimet e veta kushtetuese dhe njëkohësisht fton qytetarët që të bashkëpunojnë ngushtë dhe të kenë besim të plotë në agjencitë shtetërore të sigurisë për vendosjen e rendit dhe ligjit në tërë territorin e Republikës së Kosovës.