Hidhet poshtë iniciativa kundër “migrimit masiv”

Me përjashtim të vetë SVP-së asnjë grupacion tjetër partiak nuk e ka mbështetur iniciativën popullore me titullin “Ndal migrimit masiv”

Dhoma Nacionale e Parlamentit të Zvicrës ka hedhur poshtë të enjten në mënyrë bindëse iniciativën e SVP-UDC-së për migracionin. 128 deputetë kanë votuar kundër, vetëm 49 e kanë përkrahur këtë iniciativë ndërsa dy veta kanë qenë të përmbajtur.

Këtij votimi i ka paraprirë një debat i gjallë që ka zgjatur më shumë se shtatë orë dhe në të cilin kanë marrë pjesë mbi gjashtëdhjetë deputetë.

Me përjashtim të vetë SVP-së asnjë grupacion tjetër partiak nuk e ka mbështetur iniciativën popullore me titullin “Ndal migrimit masiv”.

Kjo iniciativë kërkon që Zvicra të kufizojë në kontingjente të caktuara vjetore numrin e lejeve të punës për të huajt. Po ashtu sipas iniciativës, shtetasit zvicerane duhet të trajtohen me përparësi në tregun e këtushëm të punës.