Greqia, pro anëtarësimit të Kosovës në BERZH

Pas anëtarësimit të Kosovës në BB dhe FMN, Kosova ka bërë pandërprerë përpjekje për anëtarësim edhe në BERZH

Greqia ende nuk e ka njohur Kosovën si shtet, megjithëse politika helene deri më tash konsiderohet si më pozitivja në krahasim me katër anëtaret tjerë të BE-së, Spanjës, Qipros, Rumanisë dhe Sllovakisë që nuk e pranojnë pavarësinë.

Kjo politikë do të konfirmohet edhe më 8 shtator kur shefi i diplomacisë greke, Stavros Lambrinidis, do të vizitojë kryeqytetin kosovar.

Zëri shkruan duke cituar një burim diplomatik ndërkombëtar se atë ditë kryediplomati helen, gjatë takimeve me zyrtarët më të lartë të shtetit të Kosovës, pritet ta zyrtarizojë edhe përkrahjen greke për anëtarësimin e Kosovës në Bankën Evropiane për Rindërtim dhe Zhvillim.

Pas anëtarësimit të Kosovës në Bankën Botërore dhe Fondin Monetar Ndërkombëtar, Kosova ka bërë pandërprerë përpjekje për anëtarësim edhe në BERZH.