Ftohen kompanitë austriake që të investojnë në bujqësi dhe pylltari

Në një konferencë për promovimin e investimeve në Grac të Austrisë, ministri i Bujqësisë, Blerand Stavileci, dhe ambasadori i Kosovës në Vjenë, Sabri Kiqmari, kanë ftuar kompanitë austriake që të investojnë në sektorin e bujqësisë dhe të pylltarisë në Kosovë.

“Në këtë konferencë kanë marrë pjesë kompani dhe ekspertë austriakë nga fusha e bujqësisë, përpunimit të ushqimit dhe pylltarisë, si dhe përfaqësues të qeverisë së provincës austriake Shtajerska”. Thujet në kumtesën e MBPZHR-së.

Sipas kumtesës ambasadori Kiqmari dhe përfaqësuesja e qeverisë lokale austriake, Eva Lipp, kanë ftuar kompanitë austriake që të shfrytëzojnë përparësitë dhe potencialet që ofron Kosova në sektorin e bujqësisë dhe pylltarisë.

Gjithashtu ministri Stavileci ka premtuar përkrahje nga Qeveria e Kosovës për investimet austriake dhe ka ftuar investuesit që të vizitojnë Kosovën për t‘i identifikuar potencialet dhe përparësitë krahasuese për investime në sektorët e bujqësisë dhe pylltarisë.

Në panel janë prezantuar edhe kompani austriake që tashmë kanë investuar në Kosovë, duke sjellë përvojën e tyre praktike dhe duke u ofruar investitorëve potencial austriak këshilla dhe dëshmi që investimet në bujqësi në Kosovë janë të mundshme dhe fitimprurëse.

Delegacioni i MBPZHR-së ka pasur edhe takime direkte me kompani austriake të interesuara për investime në Kosovë dhe ka vizituar një kompani austriake në sektorin e përpunimit të ushqimit.