FSK, ceremoni lamtumirëse për komandantin e KFOR-it, Byhler

Gjenerali Erhard Byhler i dëshiroi FSK-së të vazhdojë me përkushtim dhe krenari që të kontribuojë për popullin e Kosovës

Forca e Sigurisë së Kosovës, ka organiuzuar një ceremoni ushtarake-lamtumirëse, për kryerjen e detyrës së komandantit të KFOR-it, gjeneralmajorit Erhard Byhler dhe largimit të tij nga Kosova.

Ministri i FSK-së, Agim Çeku ka falënderuar Byhlerin për angazhimin dhe kontributin e tij në bashkëpunimin dhe koordinimin për zhvillimin e Forcës së Sigurisë së Kosovës, thuhet në njoftimin e Ministrisë së FSK-së.

Sipas njoftimit edhe komandanti i FSK-së, gjenerallejtënant Sylejman Selimi ka deklaruar se misioni i gjeneralit Byhler në krye të KFOR-it në Kosovë ka qenë jashtëzakonisht i suksesshëm.

Ai ka vlerësuar se Byhleri, ka lënë pas një FSK të vetë-qëndrueshme me aftësi dhe me kapacitete për të përmbushur misionin për të siguruar popullin dhe shtetin e Kosovës.

Ndërsa, komandanti i KFOR-it në largim, gjeneral major Erhard Byhler i dëshiroi FSK-së të vazhdojë me përkushtim dhe krenari që të kontribuojë për popullin e Kosovës.

Sipas tij KFOR-i do të vazhdojë të mbështesë FSK-në në rrugën drejt ndërtimit të një force moderne, funksionale dhe shumetnike, e cila do të kontribuojë për një Ballkan të sigurt dhe stabil.

Ministri Çeku me motivacion për kontributin dhe angazhimin e dhënë në ruajtjen e paqes në Kosovë, krijimin e një ambienti të sigurt dhe mbështetjen e vazhdueshme Ministrisë së Forcës së Sigurisë së Kosovës, ka ndarë medaljen “Shërbim i shquar”, gjeneralit Erhard Byhler, medaljen “Shërbim meritor” zëvendëskomandantit të KFOR-it, gjeneral brigade Marko Serronha dhe shefit të MCA-së, gjeneral brigade Enriko Spagnoli.