FMN e thotë fjalën e fundit

Raportet ndërmjet FMN-së dhe Qeverisë ishin zbehur pas vendimit për rritjen e rrogave të shërbyesve civilë pa pajtimin e FMN-së

Fondi Monetar Ndërkombëtar (FMN) të mërkurën do të japë fjalën përfundimtare për raportet me Qeverinë e Kosovës lidhur me buxhetin e miratuar në mars të këtij viti.

Delegacioni i FMN-së ka përfunduar sot misionin dyjavor në Kosovë, ndërsa gjatë kësaj periudhe nuk është arritur ndonjë marrëveshje konkrete me Qeverinë.

Por, sipas medieve kosovare, pritet që të mërkurën zyrtarë të FMN-së në Prishtinë të japin vlerësim për stabilitetin financiar në Kosovë.

Raportet ndërmjet FMN-së dhe Qeverisë së Kosovës ishin zbehur pas vendimit të qeverisë për rritjen e rrogave të shërbyesve civilë pa pajtimin e këtij institucioni ndërkombëtarë monetar.

Në rast se jepet vlerësim negativ, atëherë Kosova nuk mund të aplikojë për t’i mbuluar nevojat financiare me një hua prej 108 milionë euro në FMN. Po ashtu, FMN-ja do të jepte garanci që Kosovës t’i lejohen mbi 100 milionë euro tjera nga Komisioni Evropian dhe Banka Botërore.