Filarmonia e Kosovës, koncert për Javën e Frankofonisë

Sipas organizatorëve, nesër në kryeqytet mbahet një koncert i Filarmonisë së Kosovës, me dirigjenten franceze, Nathalie Marin. Koncerti mbahet në kuadër të javës së Frankofonisë

Me aktivitete të ndryshme kulturore e letrare po mbahet në Prishtinë java e Frankofonisë, e cila edhe këtë vit përveç Ambasadës së Francës mbështetet edhe nga Komunën e Prishtinës, Ambasada e Luxemburgut, Ambasada e Kanadës, Ambasada e Zvicrës dhe ajo Belgjikës në Kosovë.

Sipas organizatorëve, nesër në kryeqytet mbahet një koncert i Filarmonisë së Kosovës, me dirigjenten franceze, Nathalie Marin.

Filarmonia e Kosovës, sot mbajti edhe provat gjenerale, para paraqitjes para publikut. Pas këtyre provave, në një konferencë për media organizatorë të Javës së Frankofonisë bënë të ditur detaje rreth organizimit të programit të kësaj jave.

Drejtori i Filarmonisë së Kosovës, Baki Jashari theksoi se kjo javë është organizuar me mbështetjen e disa ambasadave të huaja në Kosovë, me theks të veçantë nga ajo e Francës.

“Mbështetet nga dhe me iniciativë të disa ambasadave, kryesisht dhe fillimisht nga Ambasada e Francës në Republikën e Kosovës, pastaj nga Ambasada e Luxemburgut dhe disa partnerë të tjerë. E gjithë kjo ndërlidhjet me Javën e Frankofonisë në Kosovë, e cila fillon me koncertin e Filarmonisë, që është nesër. Po ashtu, në këtë program janë të inkorporuar vepra që përkojnë me Javën Frankofone në Kosovë dhe me autorë që vijnë nga shtete frankofone”, tha ai.

Ndërsa, përfaqësuesja e Ambasadës së Francës, Florenc Nikoliq tha se Kosova është anëtare vëzhguese e Organizatës Ndërkombëtare të Frankofonisë, që nga viti 2014 dhe për këtë edhe Kosova, si dhe të gjitha vendet e tjera të këtij rrjeti çdo vit feston Javën e Frankofonisë, raporton KPress.

Ajo shtoi se kjo organizatë ka katër qëllime kryesore, duke shprehur shpresën që edhe universitetet e Kosovës sa më shpejtë të bëhen anëtare Agjencisë Universitare të Frankofonisë.

“Franca është kontribuesja kryesore e kësaj organizate të frankofonisë, e cila ka katër misione kryesore, promovimi i gjuhës frënge dhe diversiteti kulturor dhe gjuhësor, promovimi i paqes, demokracisë dhe të drejtave të njeriut, mbështetja e arsimit – trajnimi profesional dhe arsimit të lartë që mbështete nga Agjencioni Universitar i Farnkofonisë, që përbëhet nga 800 institucione dhe shpresoj që së shpejti edhe universitet kosovare do të jenë pjesë e këtij rrjeti”, tha ajo.

Ndryshe Java e Frankofonisë mbahet në Kosovë nga data 18 deri më 26 mars.