EULEX, 27.500 euro kush e tregon dorasin

Andrew Carney nga Prokurorinë Speciale të Kosovës tha se 20 hetues të EULEX-it dhe Policisë së Kosovës po bëjnë përpjekjet për të ndriçuar vrasjen e doganierit lituanez

Misioni i BE-së për Sundim të Ligjit (EULEX) ka premtuar një shpërblim prej 27 mijë e 500 euro, për personin që tregon se kush e ka vrarë, apo kush janë personat që i kanë zënë priten doganierit të ndjerë lituanez, Audrius Senavicius.

Gjatë një konference të përbashkët të misionit të EULEX-it dhe Policisë së Kosovës të mbajtur në Mitrovicë, u është bërë thirrje të gjithë qytetarëve që të ndihmojnë organet e rendit për kapjen e autorit apo autorëve të këtij krimi, që u krye në veri më 19 shtator.

Andrew Carney është udhëheqësi i EULEX-it në Prokurorinë Speciale të Kosovës. Ai tha se 20 hetues të EULEX-it dhe ata të Policisë së Kosovës po intensifikojnë përpjekjet për ndriçimin e rastit dhe kapjen e autorëve të krimit.

“Po ndjekim disa pista të hetimeve. Detyrë e hetuesve është që të ndjekim të gjitha pistat, por rasti duhet të zgjidhet këtu, me popullatën lokale”, ka thënë Carney, duke u bërë apel të gjithë qytetarëve që të kontaktojnë EULEX-in nëse kanë ndonjë informacion për këtë rast.

Ndërkohë, edhe komandanti rajonal për veriun i Policisë së Kosovës, Nenad Gjuriq është zotuar se hetimi i këtij rasti deri në kapjen e autorëve të krimit do të jetë një nga prioritetet e punës së policisë në pjesën veriore.

“Dua të shpreh vendosmërinë time për zgjidhjen e këtij rasti. Policia e Kosovës ka organizuar pika të kontrollit dhe është duke shkuar nga dera në derë në zonën e vendndodhjes së krimit për të pyetur nëse dikush ka parë ndonjë gjë që mund të lidhet me krimin”, tha Gjuriqm, raporton REL.

Audrius Senavicius, nga Lituania, është pjesëtari i parë i EULEX-it, i cili është vra në krye të detyrës prej se ky mision është instaluar në Kosovë. Ai ishte vra në një pritë, në rajonin e komunës veriore të Zveçanit, ku u sulmuan dy vetura të EULEX-it, teksa po ktheheshin nga pika kufitare me Serbinë në Jarinë.