E mashtrojnë popullin për vulat

Zyrtarët e Beogradit janë duke e mashtruar opinionin serb se nuk do t’i pranojnë vulat doganore në të cilat shkruan Republika e Kosovës dhe që përmbajnë simbole shtetërore, reporton Express.

Ata nuk e thonë të vërtetën që në vulat kosovare shkruan vetëm “Dogana e Kosovës” dhe nuk ka simbole. Kështu janë vulat e shumicës së shteteve. Vulat kosovare janë aprovuar qe tri vjet dhe pranohen nga BE-ja dhe OKB-ja.

Por në asnjë nga vulat e Doganës së Kosovës, të aprovuara para rreth tri vjetësh, nuk shkruan Republika e Kosovës dhe në to nuk ka simbole shtetërore.

Drejtori i Doganave të Kosovës, Naim Huruglica ka deklaruar për Express se shumica e vendeve më të mëdha në botë në vulat e tyre doganore nuk kanë simbole shtetërore dhe në to nuk shkruan “Republika”, “Mbretëria”, etj.

“Nuk është me rëndësi çka shënon brenda vulës për rregullimin e brendshëm të shtetit se a je Republikë, a Mbretëri. E rëndësishme është të shënohet emri i institucionit dhe shtetit që e lëshon atë vulë. Në këtë rast, te vulat tona shkruan Dogana e Kosovës”, ka thënë Huruglica.

Sipas tij, politikanët serbë po luajnë me opinionin në Serbi se nuk do t’i pranojnë vulat ku shkruan Republika e Kosovës, në mënyrë që kur t’i njohin vulat shtetërore që tashmë janë të njohura nga shumica e shteteve në botë, të thonë që i njohëm, por nuk shkruan Republika, por vetëm Kosova.