Diplomacia me dokument gjithëpërfshirës

Shefi i diplomacisë së Kosovës, Enver Hoxhaj, ka paralajmëruar hartimin e një dokumenti gjithëpërfshirës për politikën e jashtme të shtetit, që do të përfaqësojë interesin shtetëror në marrëdhëniet ndërkombëtare.

Këtë dokument, Hoxhaj e paralajmëroi gjatë konferencës së parë dyditore të ambasadorëve të Kosovës, e cila filloi sot në Prishtinë, ku u diskutuan çështje të ndryshme që e prekin përfaqësimin e Kosovës në botë.

“Qëllimi i parë i konferencës është që gjatë këtyre dy ditëve Ministria e Punëve të Jashtme dhe ambasadat tona të kenë një debat të mirëfilltë dhe të trajtoj çështjet se si edhe më mirë të prezantohet interesi shtetëror i Republikës së Kosovës në arenën ndërkombëtare, se si të prezantojmë më fuqishëm interesat politike e ekonomike të Kosovës në pjesë të ndryshme të botës, se si t’i përfaqësojmë interesat e qytetarëve të Kosovës në vendet ku ju jeni të pranishëm dhe të cilat ju i mbuloni…”, ka thënë ministri Hoxhaj, njoftoi Zyra për Informim e Ministrisë së Punëve të Jashtme.

Qëllimi i dytë i konferencës, sipas ministrit Hoxhaj, është që të bisedohet për fazën në të cilën është aktualisht Kosova, pozitën ndërkombëtare të shtetit, sfidat që e presin këtë pozitë ndërkombëtare të Kosovës dhe se në çfarë forme duhet të sillet Ministria e Punëve të Jashtme dhe ambasadat e Kosovës të cilat e përfaqësojnë interesin shtetëror të Kosovës.Kurse, qëllimi i tretë i Konferencës së Ambasadorëve, sipas Hoxhajt, është që nga kjo konferencë e cila do të jetë e rregullt dhe do të mbahet në baza vjetore, të nxirret një bilanc për punët e bëra, bilanc për sukseset, sfidat dhe në të njëjtën kohë të dilet me sugjerime se si të vazhdohet më tutje.

Përkitazi me Buxhetin e ndarë për Ministrinë  e Punëve të Jashtme për këtë vit, Ministri tha se ai do të jetë një buxhet i mjaftueshëm për t’i plotësuar kërkesat e parapara dhe se nuk ka shkurtime buxhetore të cilat e dëmtojnë procesin dhe punën e misioneve diplomatike të Kosovës.

“Gjatë këtij viti, gjatë muajit prill synojmë që ta përmbyllim çështjen e strategjisë për lobim dhe avokim drejt njohjeve, por  është më se e domosdoshme që Republika e Kosovës ta ketë një strategji ose dokument të politikës së jashtme, dokument i cili do ta reflektoj interesin shtetëror të Republikës së Kosovës, të jetë dokument i Presidencës, Qeverisë, Kuvendit, i partive politike dhe i të gjitha institucioneve të Kosovës”, ka thënë ministri Hoxhaj.

Në konferencë, përveç  ambasadorëve të Kosovës në botë, kanë marrë pjesë edhe ambasadorë të shteteve të huaja në Kosovë. Pjesëmarrësve i janë drejtuar edhe ambasadori i SHBA-ve në Kosovë, Christopher Dell, ambasadori i Republikës Federale të Gjermanisë në Kosovë, Hans-Dieter Steinbach dhe ambasadori i Konfederatës së Zvicrës në Kosovë, Lukas Beglinger.Konferenca do të vazhdojë nesër ku në fund do të ketë edhe rekomandimet të cilat do të inkorporohen në strategjinë për lobim dhe të politikës së jashtme të Kosovës.