Dështon ideja e AAK-së: zgjedhjet në qershor

Kryeministri Hashim Thaçi dhe lideri i opozitës, Isa Mustafa janë marrë vesh që zgjedhjet e përgjithshme të mbahen në gjysmën e parë të këtij viti

Liderët e dy partive më të mëdha politike në Kosovë, Hashim Thaçi i Partisë Demokratike (PDK) dhe Isa Musafa i Lidhjes Demokratike (LDK), janë marrë vesh të premten pasdite që zgjedhjet e përgjithshme parlamentare të mbahen në qershor. Ata po ashtu janë pajtuar që reforma zgjedhore të përfundoj në mars.

Me këtë marrëveshje, po ashtu ka dështuar përpjekja e ish-kryeministrit Ramush Haradinaj që të ngitet një mocion votëbesimi për qeverinë në Kuvend. Marrëveshjen e dy liderëve e ka konfirmuar Zyra për Informim e LDK-së, e cila po ashtu konfirmon se takime të njëjta do të mbahen edhe me liderët tjerë partiakë.

“Të dy kryetarët u pajtuan për koordinimin e agjendës politike në muajt në vazhdim. Ata u pajtuan që reforma zgjedhore të përfundohet nga Komisioni Parlamentar dhe Qeveria brenda gjysmës së parë të muajit mars ta procedojë për miratim në Kuvend”, thuhet në komunikatë.

Po ashtu, siç thuhet dy liderët, janë dakorduar që të bëhen të gjitha përgatitjet për zgjedhje të lira, demokratike dhe të mbikëqyrura nga vëzhgues ndërkombëtarë, për çfarë edhe do të bëhet kërkesë zyrtare në BE, OSBE etj.

“Të dy kryetarët kërkojnë që përgatitjet e duhura të kryhen në koordinim me subjektet politike dhe me konsensus të Kuvendit, të shkohet në Zgjedhje të përgjithshme në gjysmën e parë të këtij viti. Në ditët në vijim, do të zhvillohen takime edhe me liderët e subjekteve të tjera politike”, thuhet në njoftim. 

Kryetari i Aleancës për Ardhmërinë e Kosovës, Ramush Haradinaj, ndërkaq është i mendimit që të bëhet një koordinim i opozitës për ta shkarkuar kryeministri Hashim Thaçi në Kuvend. AAK insiston për një mocion votëbesimi dhe pas saj zgjedhjet të mban në mars.

 Por pas marrëveshjes së sotme, ideja e Haradinjat nuk do të zbatohet sepse LDK, si partia m e madhe opozitare nuk e mbështet idenë e shkuarjes në zgjedhje në muajin mars.