Deputetët i hapin rrugë hetimeve për akuzat e Dick Martyt

Parlamenti i Republikës së Shqipërisë ka miratuar me konsensus të plotë, 127 vota për dhe asnjë kundër, ligjin që i njeh EULEX-it në Kosovë autoritetin për të zhvilluar hetime edhe në Shqipëri, lidhur me akuzat e politikanit zviceran, njëkohësisht raportues në Këshillin e Evropës, Dick Marty, rreth dyshimeve për trafikim organesh dhe ekzistencë të varrezave masive në territorin shqiptar.

Marty i referohet periudhës 1998-1999, duke pretenduar se Ushtria Çlirimtare e Kosovës, gjatë periudhës së konfliktit, ka mbajtur brenda territorit të Shqipërisë civilë  me kombësi serbe, të cilëve pas vrasjes u janë tregtuar organet.

Përpara votimit, deputeti demokrat Viktor Gumi, në cilësinë e raportuesit të projektligjit në Kuvend, ka deklaruar se drafti i propozuar në qeveri ka aprovimin e të gjithë aktoreve, përfshirë këtu dhe ata politikë, duke paralajmëruar kështu miratimin unanim të tij, raportojnë mediat e Tiranës.

Qeveria shqiptare dhe aktorët politikë të të dyja krahëve janë shprehur të hapur për hetim ndërkombëtar, ndonëse janë të bindur në pavërtetësinë e këtyre akuzave.

Në deklarimin e tij gjatë prezantimit të këtij ligji, kryeministri shqiptar, Sali Berisha pati thënë se Marty është i njohur për qëndrimet e tij antishqiptare, dhe se kjo frymë është paraqitur edhe në raportin e tij, që sipas Berishës, nuk mbështetet në asnjë fakt.