Bruksel: Kosova blen ambasadën e parë

Kosova ka blerë objektin e parë për një ambasadë të veten dhe atë në kryeqendrën evropiane, në Bruksel

Ambasadori i Kosovës në Bruksel, Ilir Dugolli ka deklaruar të dielën  për Kosovatimes.net se objekti i Ambasadës ndodhet në qendër të Brukselit dhe se ai i plotëson të gjitha kushtet e nevojshme për punë.

“Është bërë një punë shumë e mirë. Është blerë Ambasada e Kosovës në qendër të Brukselit. Objekti katërkatësh ndodhet në njërën prej lagjeve më prestigjioze. Sipas informacioneve që kemi, blerja e këtij objekti ka kushtuar rreth 2 milionë euro”, ka thënë Dugolli.

“Objekti ka rreth 800 metra katrorë, ka hyrje të veçantë për punonjësit, ka oborr, park dhe hapësira tjera të nevojshme për punët e Ambasadës dhe Konsullatës. Është afër institucioneve evropiane”, ka shtuar ai.

Sipas Dugollit, objekti që është blerë nga Ministria e Punëve të Jashtme, deri tani ka qenë pronë e një shoqate për mbrojtjen e të drejtave të gazetarëve dhe shkrimtarëve.

“Këtu ka shumë objekte të ndryshme të shoqatave të ndryshme të gazetarëve e shkrimtarëve, por ata kanë vendosur që këtë objekt ta shesin”.

Megjithëkëtë, sipas Dugollit, objekti i blerë nga MPJ për këtë ambasadë nuk do të shfrytëzohet edhe për banimin e ndonjë pjesëtari të stafit diplomatik në të, por vetëm për punë.

Të gjitha ambasadat tjera të Kosovës vazhdojnë të paguajnë qira.