Brovina kërkon mbështetje nga Zvicra për shëndetësinë

Kryetarja e Komisionit për Shëndetësi, Punë dhe Mirëqenie Sociale në Kuvendin e Kosovës, Flora Brovina kërkoi nga Qeveria e Zvicrës, që të ndihmojë sistemin shëndetësor në Kosovë, duke iu mundësuar kuadrove kosovare të trajnohen jahtë vendit, me qëllim që t’u ndihmojnë pacientëve kosovarë.

Deputetja Brovina këto kërkesa i ka bërë gjatë një takimi që ka zhvilluar me ambasadoren e Zvicrës në Kosovë, Krystyna Marty Lang.

Në takim u bisedua për bashkëpunimin e frytshëm ndërmjet Kosovës dhe Zvicrës, në fusha të ndryshme, si dhe për mundësitë e zgjerimit të mëtejmë të këtij bashkëpunimi, me theks të veçantë u diskutuan mundësitë e bashkëpunimit në funksion të avancimit të sektorit të shëndetësisë së Kosovës, për sigurimet shëndetësore, si dhe për çështjen e pensioneve të qytetarëve tanë të cilët kanë punuar në Zvicër.

Kryetarja e komisionit, Brovina, e falënderoi ambasadoren Lang për mbështetjen e vazhdueshme e të pakursyer që Zvicra ka dhënë dhe vazhdon të japë për Kosovën.

Njëherësh shprehu keqardhjen për migrimin e qytetarëve tanë drejte Zvicrës dhe vendeve të BE-së.

Brovina foli edhe për Ligjin për sigurime shëndetësore, i cili pritet të fillojë të zbatohet gjatë këtij viti, e që konsiderohet mjaft i rëndësishëm për sektorin shëndetësor dhe qytetarët e vendit. Ndërsa kërkoi mbështetjen e Zvicrës në ofrimin e trajnimeve të kuadrove të sektorit të shëndetësisë me qellim të trajtimit të pacienteve brenda Kosovës dhe zvogëlimin e numrit të tyre që kërkojnë trajtim jashtë vendit.

Po ashtu Broviva kërkoi mbështetjen edhe në krijimin e qendrave për rehabilitimin e përdoruesve të substancave narkotike, si dhe të Qendrave për Aftësim Profesional dhe përshtatjen e shërbimeve për nevojat e tregut.

Ambasadorja Lang, ndërkaq, bëri një elaborim të mbështetjes që Zvicra ka bërë për Kosovën deri me tani, si dhe shprehu gatishmërinë për të vazhduar edhe më tej që të ofrojë mbështetje konkrete në këta sektorë të cilët i mbulon ky komision.

Ajo me këtë rast prezantoi edhe programet të cilat do t’i zhvillojnë në sektorin e shëndetësisë, si në ofrimin e trajnimeve profesionale për menaxheret dhe stafin profesional të institucioneve të kujdesit primar shëndetësor.

Ambasadorja, ndërkaq, përmendi edhe mbështetjen e Bankës Botërorë nëpërmjet Fondit të Mirëbesimit, në vlerë prej 25 milionë euro, për vazhdimin e reformës shëndetësore, si dhe mbështetjen e Fondit të Sigurimeve Shëndetësore.

Brovina dhe Lang u pajtuan se të dy vendet duhet t’i zhvillojnë diskutimet e nevojshme për nënshkrimin e marrëveshjes ndërshtetërore për sigurimet shëndetësore, si dhe për pensionet e qytetarëve të cilët kane jetuar dhe ende vazhdojnë te jetojnë ne Zvicër.