Brenda majit hapet tuneli i Kërrabës në rrugën Tiranë- Elbasan

Brenda majit përfundon ndërtimi i tunelit të Kërrabës, që lidh Tiranën me Elbasanit.

Ministri i Transporteve, Sokol Olldashi dhe ai i Mbrojtjes, Arben Imami, inspektuan sot punimet për ndërtimin e këtij tuneli, shkruajnë mediat shqiptare.

Duke e cilësuar rrugën Tiranë- Elbasan si më të rëndësishmen, pas Rrugës së Kombit, Ministri Olldashi ka thënë se kanë përfunduar 66% e volumit të punimeve të përgjithshme, ndërsa punimet në tunel pritet të përfundojnë në maj të këtij viti.

Sipas tij, rruga Tiranë-Elbasan do të përfundojë në pranverën e vitit 2013.

Kreu i Mbrojtjes, Imami, ka deklaruar se në të gjithë vendin do të ketë modernizim të infrastrukturës rrugore.

Autostrada Tiranë-Elbasan shkurton mesatarisht 40 minuta kohën që duhet për të shkuar nga Tirana në Elbasan.

Investimi më i rëndësishëm i rrugës është tuneli i Kërrabës, me një gjatësi prej rreth 2.4 km. Autostrada e gjatë prej 26.9 km është e ndarë në tri lote, nga të cilat: loti i parë fillon nga Unaza e Madhe deri në kilometrin e 13-të, loti i dytë është tuneli dhe loti i tretë është nga dalja e tunelit në qytetin e Elbasanit.