BKUK, pasurohet me libra të rrallë

Edhe Biblioteka Qendrore e Zvicrës, është ndër donatoret. Ajo i ka dhuruar BKUK-së 3000 tituj nga 65 shtëpi botuese

Biblioteka Kombëtare dhe Universitare e Kosovës, muajt e fundit është pasuruar me një mori librash e revistash, si dhe materialesh tjera bibliotekare nga donatorë të ndryshëm. Ata janë nga Britania e Madhe, Shtetet e Bashkuara të Amerikës, Zvicra dhe Gjermania, ka bërë të ditur ky institucion përmes një komunikate për media.

Një prej donacioneve më të rëndësishme vjen　nga koleksionistja e njohur e veprave të Skënderbeut, Patricia Nugee nga Anglia, e cila vite më parë i ka dhuruar BKUK-së　 librin me titull “Historia për jetën dhe bëmat e Skënderbeut, Princit të Epirotëve” nga Marin Barleti, përkthim nga latinishtja　 në gjermanishte i vitit 1533, që njëherësh është edhe libri më i vjetër në BKUK .

Koleksionistja e njohur Nugee　i ka dhuruar BKUK-së edhe një libër të rrallë në gjuhën angleze, botim i vitit　 1656　 me titull “Nga jeta e fisnikëve grekë dhe romakë”, i cili përmbledh në vete historinë, filozofinë dhe mendimet e çmuara të personaliteteve të rëndësishme si filozof, mendimtar, shkencëtar dhe burrështetas të periudhës antike deri në mesjetë. Vlen të përmendet se në këtë libër nga një kaptinë e veçantë u kushtohet Mbretit të Epirit Pirros dhe　Princit të Epirotëve Gjergj Kastriotit Skënderbeut. Ky është një libër i rrallë, me　 mjaft vlerë, që i pasuron fondet e koleksioneve të veçanta të Bibliotekës.

Një donacion tjetër që ka rëndësi të veçantë, sidomos për zhvillimin e koleksioneve të librit universitar vjen nga Biblioteka Qendrore e Zvicrës, e cila ka bërë dhurimin e librave　prej 3000 titujve. Këtu përfshihen librat e　65 shtëpive botuese.

Librat　dhe tekstet tjera universitare janë kryesisht në　gjuhët: gjermane, angleze, italiane, frënge , spanjolle etj. Librat janë të fushave të ndryshme si:, libra enciklopedikë, nga historia, letërsia, filozofia, shkencat politike etj. Pra, shumica prej tyre kanë të bëjnë me koleksionet universitare në fusha të ndryshme të shkencës.

Gjithashtu, të vlerës së veçantë janë edhe librat e dhuruar nga　 Anthony Mullings, Drejtor i Qendrës së Moralit dhe Mirëqenies së Ushtrisë Amerikane në Bondsteel dhe　 Renne Favors, Programere në Bondsteel, të cilët i kanë dhuruar BKUK-së　　 libra nga fusha　 beletristikës, kryesisht romane në gjuhën angleze nga shkrimtarë të njohur anglezë dhe amerikanë. Një pjesë e fondit të këtyre librave është ndarë edhe për bibliotekën e Fakultetit të Filologjisë të Universitetit të Prishtinës.

Përmes Iniciativës studentore shqiptaro-gjermane TASH , përkatësisht studentëve　 shqiptarë në Frankfurt,　 BKUK-së i është dhuruar një bibliotekë pedagogjike mbi 4000 libra, kryesisht në gjuhën gjermane.

Në ceremoninë e dorëzimit, pos përfaqësuesve të MASHT-it dhe BKUK-së ishte prezent edhe　 Knoth,　 Leitnanti i lartë i KFOR-it gjerman. Për realizimin e këtij projekti kanë kontribuar Muhamet Idrizi,　kryetar i Iniciativës Studentore Shqiptaro-Gjermane TASH dhe Mirlinda Mujeziq, anëtare e kësaj Iniciative, thuhet në njoftim.

Duhet theksuar se ky donacion është mundësuar edhe me mbështetje të Ambasadës Gjermane në Prishtinë, pastaj nga Divizioni X i Komandantit të KFOR-it　 Bühler në Sigmaringen, i cili e bëri transportin e librave nga Gjermania në Kosovë. Kontribut të　 veçantë ka dhënë edhe　 komuniteti shqiptar i Kishës Katolike në Stuttgart në emër të Viktor Spaqit.

Librat janë kryesisht nga fusha e pedagogjisë, filozofisë dhe shkencave shoqërore.