BBC lavdëron themeluesen e klubit të trashëgimisë shqiptare “Gjurmë Iliriane”

Prej tre vjetësh BBC Radio London organizon çmimet “Make a Diference” (Bëj ndryshimin), një aktivitet i cili vlerëson njerëz që e bëjnë Londrën një qytet edhe më të mirë për të jetuar. Në nominimet e këtij viti është përfshirë edhe klubi i trashëgimisë shqiptare, “Gjurmë Iliriane” dhe themeluesja e tij, Sanda Eglite.

Klubi është themeluar në maj të vitit 2023 nga Sanda Eglite, e cila arriti të sigurojë fonde dhe mbështetje për realizimin e këtij projekti ambicioz, duke investuar shumë nga koha e saj personale.

Aktualisht, mbi 100 fëmijë marrin pjesë në këtë klub javor të fundjavës, ku mësojnë gjuhën, historinë dhe traditat shqiptare, ndër të tjera. Përpjekjet e palodhura të Sandës për t’i sjellë këto mundësi në komunitetin shqiptar në Londër kanë fituar njohje, dhe ajo është nominuar për çmimin prestigjioz “Make a Difference” nga BBC Radio London.

Përmes këtij klubi, fëmijët kanë mundësinë të ndjehen më afër kulturës së prindërve të tyre. “Na ndihmon të mësojmë për kulturën tonë dhe të përmirësojmë shqiptimin e gjuhës shqipe”, thonë fëmijët, duke treguar entuziazmin e tyre për këtë iniciativë.

Sanda, e cila është nga Letonia dhe e martuar në një familje shqiptare, thekson rëndësinë e këtij klubi: “Në Klubin e Trashëgimisë Shqiptare mirëpresim çdo të dielë shumë fëmijë që na bashkohen për të mësuar gjuhën, historinë dhe traditat e pasura shqiptare. Ne realizojmë punë dore bazuar në kostumet tradicionale dhe mësojmë vallet shqiptare. Kemi një ekip të mësuesve vullnetarë të jashtëzakonshëm që bëjnë një punë të mrekullueshme”.

Projekti, i cili nisi si një iniciativë pilot me vetëm 23 nxënës, ka parë një rritje të jashtëzakonshme që prej majit 2023, duke arritur në mbi 100 fëmijë të regjistruar. Për Sandën, krijimi i këtij klubi ishte një mënyrë për të ndihmuar fëmijët e saj dhe të tjerët të ruajnë dhe të forcojnë identitetin e tyre etnik.

Një nga prindërit, Endri, shprehet: “Unë sjell këtu djalin dhe vajzën time. Është shumë e rëndësishme që ata të lidhen me kulturën shqiptare, të mësojnë gjuhën dhe traditat, dhe të kenë mundësinë të komunikojnë me gjyshërit e tyre në Shqipëri. Është e mrekullueshme ta shohësh vajzën duke kërcyer vallet tradicionale dhe buzëqeshjen në fytyrën e saj”.

Në kaq pak kohë klubi “Gjurmë Iliriane” ka arritur të bëhet një qendër e rëndësishme për komunitetin shqiptar në Londër, duke kontribuar në rritjen e brezit të ri të ilirëve në Mbretërinë e Bashkuar, duke ruajtur dhe promovuar trashëgiminë e tyre të çmuar.