Bazeli, në ethet e lules më të madhe në botë

Trungu i lules, i cili do plot 17 vite për të mbërritur lartësinë maksimale (rreth 2 metra), lulet e saj i qel vetëm një herë në tre vjet

Prej tri ditësh në kopshtin botanik të Bazelit po mbretëron një tollovi e madhe. Mijëra qytetarë kureshtarë presin në radhë të gjata për të qenë dëshmitarë të një fenomeni të rrallë: duan të shohin lulëzimin e lules më të madhe në botë ‘Amorphophallus titanum’. Një rast të tillë zviecranët e kanë pasur së fundi para 75 viteve!

Qelja e lules në fjalë është pritur të ndodhte më 21 prill, por teket e natyrës e kanë shtyrë aktin në fjalë për mbrëmjen e vonshme të 22 prillit, pra lulëzimin e plotë gjiganti në mesin e luleve e ka arritur në Natën e Pashkëve.

Për tu dhënë rastin sa më shumë vizitorëve që të shohin këtë fenomen, parku botanik i Bazelit nuk i ka mbyllur portat e tij natën e mbrëmshme. Deri në mëngjesin e sotëm lulen e kanë parë rreth 3000 veta. Dhe, radhët e kureshtarëve vazhdojnë edhe sot, ndërsa kopshti do t`i mbyllë portat në mesnatë.

Trungu i lules, i cili do plot 17 vite për të mbërritur lartësinë maksimale (prej rreth 2 metrash), lulet e saj i qel vetëm një herë në tre vjet. Dhe kur mbërrin lulëzimin e plotë, ajo lëshon një erë shumë të pakëndshme, të ngjashme me erën e kafshëve të ngordhura.