Amnesty International: Lëvdata dhe kritika për Zvicrën

Kritika për Iniciativën për dëbimin e të huajve kriminelë dhe për trajtimin e migrantëve dhe azilkërkuesve

Në raportin vjetor të Amnesty International të publikuar dje, 157 shtete kritikohen për shkelje të të drejtave të njeriut. Ndërsa për tortura dhe keqtrajtime ai drejton kritika edhe ndaj 98 shteteve të botës.

Kjo organizatë, sa i përket Zvicrës tërheq një bilanc të përzier: me kritika dhe lavdërime, shkruan drs.ch. Si hap pozitiv në respektimin e të drejtave të njeriut përmendet veç tjerash themelimi i një komisioni në nivel nacional për mbrojtje nga tortura dhe themelimi po ashtu edhe i një qendre kompetence për të drejtat e njeriut.

Ndërkaq kritikat kryesore që i drejtohen Zvicrës kanë të bëjnë me iniciativën për dëbimin e të huajve kriminelë (e miratuar vitin e kaluar) dhe me trajtimin e migrantëve dhe azilkërkuesve. Në këtë kontekst janë përmendur ushtrimi i dhunës nga na e policisë në disa marrje në pyetje si dhe strehimi i azilkërkuesve në qendrat nëntokësore të mbrojtjes civile për kohë të pacaktuar.