Afaristët nga Shqipëria bojkotuan Forumin e Biznesit Kosovë-Shqipëri

Kreu i AKB-së, Agim Shahini:Duhet të rritet edhe më shumë shkëmbimi tregtar mes Kosovës e Shqipërisë

Rreth 30 biznese nga Kosova kanë marrë pjesë në Forumin e Biznesit Shqipëri-Kosovë me temë “Rritja e shkëmbimeve ekonomike-tregtare Shqipëri-Kosovë, në kushtet aktuale”, por nuk ka ekzistuar një vullneti i tillë edhe nga bizneset shqiptare për të marr pjesë, përveç disa zyrtarëve të Qeverisë shqiptare.

Në forumin e mbajtur të premtën nuk munguan as zyrtarët e institucioneve të Kosovës, duke u përfaqësuar me ministrin e Zhvillimit Ekonomik, Besim Beqaj, ndërsa nga Qeveria shqiptare në mungesë të ministrit të Ekonomisë, Tregtisë dhe Energjetikës, Ridvan Bode, i pranishëm ishte zëvendësministri, Enno Bozdo.

Me këtë rast ministri Beqaj u ka bërë thirrje bizneseve shqiptare që të vijnë dhe të qëndrojnë në Kosovë dhe për të shfrytëzuar këtë situatë. 

Nga ana tjetër, Enno Bozdo, zëvendësministër i Ekonomisë, Tregtisë dhe Energjetikës, ka deklaruar se kjo situatë e krijon mundësi për bizneset shqiptare.

Kryetari i Aleancës Kosovare të Biznesit, Agim Shahini ka thënë se në këtë kohë bizneset duhet të mendojnë për interesat ekonomike, por mos të jenë mbi ato kombëtare.

Ftesa për bizneset shqiptare nuk ka munguar as nga kreu i AKB-së, Shahini, duke thënë se duhet të rritet edhe më shumë shkëmbimi tregtar mes Kosovës e Shqipërisë, nga ai që ka qenë deri më tash. 

Fjalët nuk kanë munguar për rritje të bashkëpunimit edhe nga komuniteti i biznesit shqiptar.

Nikolin Jaka, kryetar i Dhomës së Tregtisë dhe Industrisë së Tiranës, ka thënë se është momenti i duhur që të shfrytëzohen këto mundësi mes Shqipërisë dhe Kosovës. 

Komuniteti i biznesit të Kosovës gjithnjë e më shumë është duke bërë përpjekje që të bashkëpunojë më shumë me komunitetin e biznesit nga Shqipëria.