AAK-ja kërkon përsëritjen e regjistrimit të popullsisë

Kanë nisë të shtohen zërat për regjistrimin e popullësisë në Kosovës, duke e cilësuar atë të dështuar

Pas Akademisë së Shkencës dhe Arteve të Kosovës dhe KMDLNJ-së, edhe Aleanca për Ardhmërinë e Kosovës e ka cilësuar të dështuar regjistrimin e popullsisë në Kosovë. 

Kjo parti politike ka kërkuar përsëritjen e këtij procesi, pasi që sipas saj në regjistrimin në muajin prill nuk janë përfshirë të gjithë qytetarët e Kosovës.

Sipas AAK-së procesi i regjistrimit të popullsisë do të ketë pasoja ekonomike për shkak të zvogëlimit të forcës reale të numrit të banorëve, i cili del të jetë më i vogël se sa ishte pritur.

Gjithashtu është theksuar se këtë proces e kanë shoqëruar shumë parregullsi, si mos zbatimi i Ligjit për regjistrim të popullsisë dhe mos regjistrimi i qytetarëve serbë në veri. 

Enti i Statistikave të Kosovës ka publikuar rezultatet preliminare të procesit të regjistrimit të popullsisë, sipas të cilave del se në vendit tonë jetojnë rreth 1.8 milionë banorë. 

Sipas regjistrimit të popullsisë në vitin 1981, Kosova kishte rreth 1.6 milionë banorë që del se për 30 vjet vendi ynë ka vetëm rreth 200 mijë banorë më shumë.