Arnold Gjergjaj rikthehet në ring

Më datën 5 dhjetor, Gjergjaj do të boksoi kundër kroatit, Marino Goles në Spreitenbach të Zvicrës

Kampioni evropian i boksit në kategorinë EBU-EE, shqiptari Arnold Gjergjaj do të rikthehet sërish në ring.

Më  5 dhjetor ai do të boksoi kundër kroatit, Marino Goles në Spreitenbach të Zvicrës.

Boksieri kosovar i cili jeton në Bazel të Zvicrës, në fitoren e fundit në qershor të këtij viti ndaj boksierit rus Denis Bakhtov, kishte lënduar dorën dhe iu deshtë disa muaj për t’u rikuperuar.

“Siç e dini në raundin e katërt të asaj ndeshje unë e pata lënduar dorën e djathtë, por më mbështetjen e gjithë atij publiku, vendosa që të vazhdoj deri në fund. Fatmirësisht ia arrita të fitoj. Më është dashur të pres një kohë të gjatë derisa dora më është shëruar. Tani ndihëm shumë mirë”, shprehet Arnoldi për “albinfo.ch”.

Gjergjaj, i njohur më nofkën “The Cobra” ende nuk njeh humbje në boksin profesionist. Ai premton se edhe në këtë ndeshje do të dal fitues për të vazhduar karrierën e tij drejt titullit të botës në kategorinë e peshës së rëndë.

“Ndeshja do të jetë më tetë (8) runde. Gjithçka është duke shkuar mirë. Jam duke u përgatitur maksimalisht për të fituar edhe këtë ndeshje”, shprehet ai.

Aktualisht boksieri më origjinë nga Gjakova gjendet në vendin e 29-të të listës së boksit botërorë. Ai deri më tash ka zhvilluar 28 ndeshje dhe ka 28 fitore, 20 prej tyre më nokaut.