Në Cyrih, taksapaguesit po paguajnë qiratë e azilkërkuesve në banesat “Sugus”

(KEYSTONE/Michael Buholzer).

Një pjesë e qirave për azilkërkuesit që jetojnë në kompleksin e diskutueshëm “Sugus” në Cyrih mbulohet nga fondet publike, ndërsa pronat janë ende pjesë e një beteje ligjore mes pronarit dhe qiramarrësve.

Sipas një hulumtimi të televizionit zviceran SRF, pesë azilkërkues jetojnë aktualisht në ndërtesat “Sugus”, ndërsa aty janë strehuar edhe persona që marrin ndihmë sociale.

Në një rast të dokumentuar, tre burra nga Afganistani dhe Etiopia jetojnë në dhoma të veçanta të një apartamenti me 4.5 dhoma. Organizata e Azilit të Cyrihut (AOZ) paguan deri në 1,200 franga në muaj për secilën dhomë, duke e çuar koston totale në 3,600 franga në muaj.

Sipas SRF-së, kjo shumë është rreth dyfishi i qirasë që kushtonte i gjithë apartamenti përpara largimit të qiramarrësve të mëparshëm.

AOZ thotë se nuk ka bazë ligjore për të përjashtuar në mënyrë të përgjithshme pronarë të caktuar nga kontratat e reja të qirasë. Sipas organizatës, një veprim i tillë do të kufizonte mundësitë për strehimin e personave që marrin ndihmë sociale.

Kompleksi “Sugus” është prej kohësh në qendër të një konflikti mes pronarit dhe qiramarrësve. Autoriteti i arbitrazhit i kishte cilësuar si abuzive largimet masive të 105 qiramarrësve, ndërsa procedurat gjyqësore për këtë çështje vazhdojnë.

Ndërkohë, në disa apartamente janë vendosur ndarje të brendshme për krijimin e dhomave shtesë. Sipas banorëve, kjo është bërë në të paktën pesë apartamente. Autoritetet nuk kanë konfirmuar nëse për këto ndërhyrje janë marrë lejet e nevojshme të ndërtimit.

Rregullat e kantonit të Cyrihut kërkojnë që apartamentet me të paktën tri dhoma të kenë kuzhinë me dritare. Shkeljet e qëllimshme të rregullave të ndërtimit mund të ndëshkohen me gjobë deri në 50 mijë franga zvicerane.

Ndërtesat “Sugus” janë përballur gjithashtu me ankesa për zhurmë nga mysafirët e Airbnb-së dhe me raportime për thyerje në hapësirat e përbashkëta.