Qytetet evropiane për t’i vizituar gjatë vjeshtës, Cyrihu mes tyre

Lista përfshin 11 qytete evropiane, nga Roma deri në Cyrih, të përzgjedhura për eksperiencat që ofrojnë gjatë sezonit të ndërmjetëm

Fillimi i vjeshtës është një nga periudhat më të mira për të eksploruar Evropën. Temperaturat janë më të buta, turmat e turistëve të verës janë larguar dhe çmimet e hoteleve janë shpesh më të favorshme.

Sipas “Lonely Planet”, shtatori dhe tetori ofrojnë një ekuilibër ideal mes motit të mirë, aktiviteteve kulturore dhe një atmosfere më autentike lokale.

Lista përfshin 11 qytete evropiane, nga Roma deri në Cyrih, të përzgjedhura për eksperiencat që ofrojnë gjatë sezonit të ndërmjetëm, shkruan Monitor, transmeton albinfo.ch.

Roma, Itali

Kryeqyteti italian është më i këndshëm në shtator dhe tetor, kur temperaturat bien në rreth 24°C dhe fluksi i turistëve zvogëlohet.

Kjo e bën më të lehtë vizitën e monumenteve si Forumi Romak dhe Koloseu. Vjeshta përkon gjithashtu me sezonin e vjeljes së rrushit, duke sjellë festivale vere dhe ushqimi në zona si Toskana dhe Siçilia.

Kopenhagen, Danimarkë

Në vjeshtë qyteti merr një atmosferë tipike “hygge”, me kafene të ngrohta, muze dhe ambiente më të qeta. Është një periudhë e mirë për të shijuar kulturën, modën dhe kuzhinën daneze.

Lisbonë, Portugali

Në fillim të vjeshtës, Lisbona kombinon motin e ngrohtë me aktivitete kulturore, festivale dhe kuzhinë tradicionale.

Lagjja Alfama mbetet një nga zonat më tërheqëse për shëtitje, ndërsa plazhet pranë qytetit vazhdojnë të jenë aktive edhe në këtë periudhë.

Dubrovnik, Kroaci

Pas kulmit të sezonit veror, qyteti bëhet më i qetë, ndërsa deti mbetet i përshtatshëm për not.

Në tetor, vizitorët mund të shijojnë më lehtë muret historike të qytetit, shëtitjet dhe festivalet lokale.

Budapest, Hungari

Shtatori dhe tetori sjellin temperatura më të buta, shëtitje përgjatë Danubit dhe mundësi për të vizituar banjat termale të famshme.

Qyteti organizon gjithashtu festivale vere dhe arti gjatë kësaj periudhe.

Athinë, Greqi

Me largimin e vapës së fortë të verës, Athina bëhet më e përshtatshme për vizita në Akropol dhe monumentet historike. Në vjeshtë ulen edhe çmimet për hotele dhe atraksione turistike.

Lista vijon me Pragën në Çeki, e njohur për atmosferën e saj vjeshtore dhe festivalet kulturore; Nicën në Francë, ku Riviera mbetet e ngrohtë dhe më pak e mbushur me turistë; Seviljen në Spanjë, që përkon me sezonin e vjeljes së rrushit dhe festivaleve të verës; Amsterdamin në Holandë, me festivale dhe më pak turma; si dhe Cyrihun në Zvicër, ku shtatori dhe tetori sjellin ajër alpin, aktivitete kulturore dhe sezonin e çokollatës.

---