Suspendohen Blatter dhe Platini

Kryetari në detyrë i FIFA-s, Sepp Blatter dhe ai i UEFA-s, Michel Platini janë suspenduar sot për 90 ditë nga funksioni. Këtë e ka kumtuar sot kryetari i komisionit të etikës, Hans-Joachim Eckert.

Shkas konkret i këtij suspendimi është pagesa prej 2 milionë eurove që Blatter thuhet t`ia ketë paguar Platinit, për çfarë kundër Blatter-it aktualisht po zhvillon hetime edhe Prokuroria federale e Zvicrës. Veprat penale për të cilat ngarkohet kryetari shumëvjeçar i organizatës botërore të futbollit, janë trajtimi jolojal dhe eventualisht edhe përvetësimi.

Pezullimi i Blatter-it nënkupton që ai deri në janar të mos ketë qasje në zyrën e tij në Zürichberg dhe të heqë dorë nga të gjitha aktivitetet zyrtare të futbollit. Madje, ai ka ndalesë hyrjeje në të gjithë stadiumet e botës, shkruajnë mediet zvicerane sot!

Por jo vetëm kaq: në rast se dëshmohen të vërteta akuzat që po i bëhen, Sepp Blatter mund të dënohet me deri në 7.5 vjet burg.