ILir Meta po qëndron për vizitë zyrtare në Zvicër

Në kuadrin e vizitës që po i bën Zvicrës, kryetari i Kuvendit të Shqipërisë Ilir Meta në krye të një delegacioni parlamentar është pritur nga kryetari i Parlamentit të Zvicrës, Stephane Rossini. Në Pallatin Federal (selia e Parlamentit) është vendosur sot Flamuri i Shqipërisë krahas atij të Zvicrës në shenjë respekti dhe mikpritjeje për mysafirin e lartë nga Shqipëria.

Më herët sot kryetari i Parlamentit të Shqipërisë, Ilir Meta është pritur sot nga Kryetari i Bashkisë së Bernës Alexander Tschäppät. i cili ka shprehur me këtë rast ndjenjat më të ngrohta të miqësisë për Shqipërinë dhe popullin shqiptar.

Kryetari i Kuvendit nga ana e tij shprehu kënaqësinë për këtë vizitë zyrtare në Zvicër, duke vlerësuar marrëdhëniet e shkëlqyera mes dy vendeve, si dhe peshën e kontributin e komunitetit shqiptar në Zvicër. Meta po ashtu u shpreh se Zvicra përfaqëson një vend mik të veçantë për të gjithë shqiptarët dhe se shkëmbimi i eksperiencave dhe ekspertizës me qytetin e Bernës i kontribuon cilësisë së marrëdhënieve dypalëshe mes Shqipërisë dhe Zvicrës.

Sot pasdite kryetari Meta pritet edhe në Ambasadën e Kosovës në Bernë, nga ambasadori Naim Malaj.