Mungesë e kartave të sigurimit shëndetësor në Zvicër, kjo është arsyeja

Kompanisë i është dashur të merrej me një vëllim prodhimi të kartave, tri herë më të lartë se zakonisht

Në Zvicër aktualisht janë dhjetëra mijë të siguruar që nuk kanë kartë sigurimi shëndetësor, trasnmeton albinfo.ch. Kështu, Helsana, CSS, Swica dhe kompani të tjera të sigurimeve shëndetësore kanë ngelur prapa afatit sa i përket dorëzimit të kartave.

Arsyeja e vonesave është se shumë njerëz kanë ndryshuar sigurimin e tyre bazë, thotë një përfaqësues i shoqatës së sigurimeve shëndetësore Santésuisse, shkruan sonntagsZeitung. Prandaj, prodhuesi i kartave nuk mund të vazhdojë me prodhimin.

Kartat në fjalë prodhohen nga Sasis AG, një degë e shoqatës së sigurimeve shëndetësore Santésuisse. Kompanisë i është dashur të merrej me një vëllim tri herë më të lartë se zakonisht, tha zëdhënësi i Santésuisse, Manuel Ackermann, për agjencinë e lajmeve Keystone-SDA.

Mediat Tamedia kishin raportuar më parë për pengesa sa i përket dorëzimit. Kartat e sigurimit ishin printuar të gjitha dhe ishin dërguar në dhjetor, përcjell albinfo.ch. Megjithatë, sipas Ackermann, kapaciteti i prodhuesit të kartave është i kufizuar. Vonesa arrin deri në maksimum tri javë.

Mungesa e kartës së sigurimit shëndetësor mund të shkaktojë probleme për ata që udhëtojne jashtë vendit, shkruan gazeta e së dielës. Por, edhe në Zvicër, kjo çon në më shumë punë administrative, pasi të dhënat duhet të futen manualisht.

---