Ëmbëlsirat e prishura serbe, së shpejti në tregjet zvicerane?

Sipas organizatës serbe për mbrojtjen e konsumatorit (NOPS) bëhet fjalë për ëmbëlsira me manaferra dhe në formë zemre, porosi e kompanisë gjermane Cristallo, e prodhuar në Serbi

Plot 18 mijë torta të paketuara, prodhime industriale nga Serbia pasi janë hedhur në një deponi bërlloku si të prishura, mund të përfundojnë në marketet dhe së fundi në tavolinat zvicerane. Ato janë destinuar për tregun gjermanofon (Gjermani, Zvicër dhe Austri) ku do të shiteshin Ditën e Shën Valentinit, më 14 shkurt.

Sipas organizatës serbe për mbrojtjen e konsumatorit (NOPS) bëhet fjalë për ëmbëlsira me manaferra dhe në formë zemre, porosi e kompanisë gjermane Cristallo, e prodhuar në Serbi.

Shefi i kësaj kompanie Claus Schwermann konfirmon faktin e vjedhjes së tortave në fjalë nga deponia e bërllokut. Por ai thotë se zviceranët nuk kanë arsye të frikësohen. “Në Zvicër aktualisht nuk eksportohen tortat “Cristallo-Himbeer-Herztorten”. Në depot e Cristallo-s ka aktualisht sasi të mjaftueshme të kësaj ëmbëlsire të destinuar për të plotësuar kërkesat e Gjermanisë dhe Austrisë. Ai ka shtuar se kualiteti i këtyre tortave është kontrolluar në mënyrën më të përpiktë. Ndërkaq, Schwermann ka thënë se tortat e vjedhura nga deponia (ku ishin hedhur si të prishura) mund të identifikohen në bazë të numrit të produktit që e kanë në paketimet e tyre.

Në përgjithësi, tregtarëve të mundshëm të këtij malli u është tërhequr vërejtja që të kenë kujdes nga ky mall i vjedhur që vjen nga Serbia. Por, siç shkruan 20miuten.ch, fabrika serbe e tortave nuk e ka njoftuar Cristallo-n lidhur me ngjarjen. Ky koncern gjerman është informuar vetëm pasi është kontaktuar nga gazeta. Sipas saj, rreziku i ardhjes së tortës në fjalë në tregun e Zvicrës megjithatë nuk und të përjashtohet plotësisht. Sipas një zëdhënësi të administratës doganore të Zvicrës, ky rrezik është tepër i vogël. “Mallrat që sillen në Zvicër kontrollohen me dyshimin për rrezikshmërinë e tyre.

Nëse këto torta megjithatë do ta gjejnë rrugën për në Zvicër, kjo do të mund të bëhet vetëm në bazë ilegale, gjë që nuk mund të parandalohet. “Kontrollimi sistematik i të gjitha mallrave që hyjnë në Zvicër, nuk është i mundshëm, nisur nga numri dhe sasia e tyre”, ka thënë zëdhënësi.