Në Hungari arrestohen qindra emigrantë kosovarë

Sipas medieve lokale, më shumë se 900 refugjatë janë arrestuar nga policia hungareze gjatë përpjekjeve për të kaluar ilegal nga Serbia në Hungari. Shumica janë kosovarë

Autoritete kufitare të Hungarisë kanë shtrënguar kufirin me Serbinë, pas “invadimit” të kosovarëve për të migruar në shtetet e Bashkimit Evropian. Sipas medieve lokale, më shumë se 900 kosovarë, janë arrestuar nga policia hungareze gjatë përpjekjeve për të kaluar ilegal nga Serbia në këtë shtet.

Kosovarët, siç raporton lajmi.net, janë arrestuar gjatë fundjavës në Csongrad nga Policia e Hungarisë.

Sipas autoriteteve hungareze, janë arrestuar 912 kosovarë në 117 grupe të cilët ilagl kishin kaluar kufirin Serbi-Hungari. Shumica janë fëmije dhe gra nga Kosova dhe nga vendet aziatike.

Ndryshe, gjatë muajit të fundit janë mijëra kosovarë nga vendet e ndryshme të Kosovës, por kryesisht nga Ferizaj e Gjilani që po emigrojnë jashtë vendit. Ata me autobus po ikin drejt Beogradit, ndërsa nëpërmjet Hungarisë, pikësynim e kanë Francën, e cila edhe ashtu Kosovën e ka futur në mesin e shteteve të pasigurta.

Vetëm brenda këtij viti, shtatëmijë qytetarë të Kosovës kanë kërkuar azil në Hungari. Shumica prej tyre kufirin e kaluan në mënyrë ilegale, ndërsa shteti hungarez këtë vit nuk ia ka njohur statusin e refugjatit asnjë qytetari të Kosovës.

Ambasada e Hungarisë në Prishtinë, një javë më parë, ka raportuar për një valë të re të kosovarëve, ndërsa ka ritheksuar se shteti hungarez nuk jep azil për kosovarët.

“Të gjithë ata që hyjnë ilegalisht në Hungari, merren në mbajtje nga policia, e pas disa verifikimeve që u bëhen kthejnë në Kosovë. Në rast të kërkesës për azil ata mund të mbahen në paraburgim në periudhë prej 3-60 ditë, për ta verifikuar nëse i takon apo jo azili”, thuhet në njoftimin e ambasadës.