Edhe Boksi i Kosovës pranohet ndërkombëtarisht

Federatën Ndërkombëtare të Boksit gjatë kongresit të AIBA-s që po mbahet në Korenë e Jugut e pranoi Kosovën anëtare me të drejta të plota të kësaj federate

Federata e Boksit e Kosovës është pranuar me të drejta të plota në Federatën Botërore e Boksit (AIBA), duke bërë edhe një hap të madh për ndërkombëtarizimin e sportit kosovar. Ky konsiderohet rezultati më i madh sportiv pas pranimit të Komitetit Olimpik të Kosovës (KOK) në Komitetit Olimpik Ndërkombëtar (KON).

Bashkë me Kosovën në Federatën Ndërkombëtare të Boksit janë pranuar edhe India e Mikronezia, kurse Malta nuk është pranuar.

Vendimi është marrë në orët e para të mëngjesit të së premtes sipas kohës sonë në Korenë Jugore ku po zhvillohet kongresi i AIBA dhe ku marrin pjesë edhe kryetari i Federatës së Boksit të Kosovës (FBoxK), Ramadan Selimi bashkë me presidentin e Komitetit Olimpik të Kosovës (KOK), Besim Hasanin.

Lajmin e pranimit e Kosovës në AIBA e ka konfirmuar për KPress zëdhënësi i FBoxK-së, Latif Demolli.

“FBK është pranuar më drejta të plota në AIBA. FBoxK është federata e 195-të e AIBA-së”, ka thënë Demolli në orët e para të mëngjesit të ditës së sotëm.

Ndërkohë, edhe Ministri i Sportiti, Memli Krasniqi, ka shprehur gëzimin e tij me anë të një statusi në rrjetet sociale. “Një tjetër hap i rëndësishëm. Federata e Boksit e Kosovës është bërë anëtare e plotë e AIBA-s. Faleminderit President Wu dhe shumë fat boksierëve tanë”, ka shkruar ai.

Kosova bëhet anëtarja e 195-te e AIBA-s.