Diaspora mbush “kuletën” e Maqedonisë

Prej vitit 2004 deri më sot, sipas një hulumtimi, hyrjet nga diaspora në Maqedoni sillen mes 18 deri 20 për qind të Prodhimit të Përgjithshëm Bruto

Mërgimtarët vazhdojnë të jenë shtylla kryesore e ekonomisë maqedonase duke kontribuar rreth 20 për ind në Bruto Prodhimin e Përgjithshëm të këtij shteti. Remitencat më të mëdha në këtë shtet vijnë nga Gjermania rreth 24 për qind, nga Italia 22 për qind, nga Austria 13 për qind dhe nga Zvicra 11 për qind.

Me përqindje të konsiderueshme kontribuojnë edhe Sllovenia, Turqia dhe shtete të tjera perëndimore.

“Prej vitit 2004 deri më sot, sipas një hulumtimi që kemi bërë, hyrjet nga diaspora sillen mes 18 deri 20 për qind nga Prodhimi i Përgjithshëm Bruto. Kjo është shumë e rëndësishme, e cila në masë të madhe ndihmon edhe në stabilitetin e jashtëm të denarit, në raport me euron”, tha Antonio Milloshovski, kryetar i Komisionit për Punë të Jashtme.

Në kuadër të bilancit të pagesave, sipas tij, ka kategori të transfertave private, që janë shumë të larta.

Ndërsa Shefki Idrizi nga kompania “Renova”, iu bëri apel autoriteteve maqedonase që të angazhohen për shkurtimin e procedurave burokratike, pasi sipas tij, shumë investues mund të zmbrapsen si shkak i procedurave të gjata për nxjerrje të dokumentacioneve të duhura për biznes.

“Në të gjitha komunat e Maqedonisë nuk është lehtë për të arritur deri te një dokument të shkruar, edhe pse ligji na porosit ndryshe, po ashtu edhe komunat, administrata shtetërore në përgjithësi. Ne që jetojmë gjithmonë këtu, jemi adaptuar. Por, ata të diasporës nuk e kuptojnë”, deklaroi Idrizi citon AlsatM.

Këto çështje u diskutuan gjatë një debatit publik të Komisionit për Punë të Jashtme, ku u diskutua për rëndësinë e mërgimtarëve në zhvillimet politiko-ekonomike të Maqedonisë.