Protestohet në mbrojtje të gazetarëve

Protesta është organizuar nga Asociacioni i Gazetarëve të Kosovës, ndërsa do të kërkohet mjedis i sigurt për ushtrimin e profesionit të gazetarisë dhe të lirisë së shprehjes

Plagosja me thikë e gazetarit Milot Hasimja në vendin e punës në Klan Kosova, ka indinjuar komunitetin e gazetarëve në Kosovë, të cilët kanë paralajmëruar protesta sot në ora 11 në sheshin “Zahir Pajaziti”. Në protesta janë ftuar edhe përfaqësuesit e shoqërisë civile dhe qytetarët kosovarë.

Protesta është organizuar nga Asociacioni i Gazetarëve të Kosovës, ndërsa do të kërkohet mjedis i sigurt për ushtrimin e profesionit të gazetarisë dhe të lirisë së shprehjes.

‘Qëllimi i organizimit të kësaj proteste është sensibilizimi i opinionit me dhunën në rritje ndaj gazetarëve, sidomos pas rastit të fundit të therjes me thikë të gazetarit, Milot Hasimja’, thuhet në njoftimin e AGK-së.

Ndryshe, Milot Hasimja, të hënën është sulmuar me thikë nga një qytetarë me emrin Sovran Syla. Ky i fundit e ka goditur 4 herë me thikë në qafë gazetarin Hasimja, i cili  është dërguar me urgjencë në Klinikën Universitare.

Ai është jashtë rrezikut për jetë, ndërsa shkas besohet se është bërë një storje teleizive.

Pas këtij sulmi ka reaguar presidentja e Kosovës, Atifete Jahjaga, kryeministri në detyrë, Hashim Thaçi, partitë politike, organizatat vendore e ndërkombëtare. Të gjithë këtë e kanë cilësuar si sulm ndaj fjalës së lirë.

Ndryshe, vetëm gjatë 6 muajve fundit janë raportuar rreth 20 raste ku janë sulmuar apo kërcënuar gazetarët.