Franca s’pranon refugjatë nga Shqipëria

Autoritetet e Francës konsiderojnë se Shqipëria është vend stabil me institucione funksionale, prandaj nuk do të pranohen refugjatë nga ky vend

Këshilli Shtetëror në Francë ka miratuar vendimin e Zyrës për refugjatët, i cili e rendit Shqipërinë në listën e vendeve të sigurta të origjinës. Sipas këtij vendimi, autoritetet francezë nuk do të pranojnë më refugjatë nga Shqipëria, pasi që konsiderohet se Shqipëria është vend i sigurt.

Sipas nenit L. 741-4 të Kodit për Hyrjen dhe Qëndrimin për të Huajt dhe Azilin në Francë, një vend konsiderohet i sigurt në qoftë se sigurohen parimet e lirisë, demokracisë, sundimi i ligjit dhe të të drejtave të njeriut e lirive themelore.  

“Këshilli i Shtetit ka vlerësuar se Shqipëria ka institucione demokratike. Ajo është palë në Konventën Evropiane për Mbrojtjen e të Drejtave dhe Lirive Themelore të Njeriut. Po ashtu janë ndërmarrë masa në luftën kundër korrupsionit dhe reformat në ligjet penale dhe civile pritet të forcojnë mbrojtjen e lirive themelore”, konsiderohet në vendim.

Duke pasur parasysh të gjitha këto elemente, të cilat shënojnë një forcimin e procesit demokratik, Këshilli i Shtetit në Francë, siç raporton BW, vendosi se, “përkundër vështirësive të vazhdueshme në luftën kundër krimit, Shqipëria duhej renditur në listën e vendeve të sigurta të origjinës”.

Ndryshe, sipas statistikave të Eurostat, Shqipëria dhe Kosova vazhdojnë të jenë një ndër vendet me numrin më të madh të azilkërkuesve në Bashkimin Evropian.