Asgjësohen 50 mijë litra alkool

Një pjesë e alkoolit të asgjësuar është futur ilegalisht ne territorin e Kosovës, ndërsa pjesa tjetër është prodhuar në mënyrë ilegale me tiketa false

Policia dhe Doganat e Kosovës në një aksion të përbashkët, ka asgjësuar më shumë se 50 mijë litra alkool që ishte konsideruar si e falsifikuar dhe e kontrabandimit në Kosovë. Kjo sasia e ndaluar dhe sekuestruar e alkoolit, është hasur në një depo në regjionin e Prishtinës.

 

Një pjesë e alkoolit, sipas njoftimit zyrtar, është futur ilegalisht ne territorin e Kosovës, ndërsa pjesa tjetër është ndaluar sepse është prodhuar në mënyrë ilegale me tiketa false.

 

“Për të verifikuar mbi gjendjen shëndetësore të këtyre produkteve është ftuar inspektorati fito-sanitar i Agjencisë se Ushqimit dhe Veterinarisë i cili ne mungesë të dokumentacionit nxori vendim për asgjësim pasi qe nuk i plotëson kushte për tregtim dhe konsum”, thuhet në njoftim.

 

Bashkëpunimi ndërmjet tri agjencive për ruajtjen e kufirit të cilat veprojnë në kuadër të Menaxhimit të Integruar të Kufirit (MIK), sipas tp njëjtit njoftim, është duke treguar sukses ne parandalimin e tregtimit apo shitjes se gjitha mallrave që nuk i’u nënshtrohen kontrollit zyrtare.

 

“Këto alkoole në momentin e ndalimit nuk kanë poseduar dokumente përcjellëse për origjinën e tyre, certifikatën shëndetësore, importuesin e produktit, disa nga to nuk kanë pas deklaratë të produktit. Po ashtu pala ka tentuar të prodhojë lloje të ndryshme të pijeve alkalike me tiketa të falsifikuar dhe ne kushte të palejuara për prodhim”, thuhet në njoftim.

 

Produktet si të tilla konsiderohen të dyshimta dhe nuk lejohen për futjen në treg për konsum.

 

“Alkooli si produkt i pa kontrolluar mund të jetë shumë i rrezikshëm dhe vdekjeprurës për njerëz. Organet shtetërore për siguri publike do të veprojnë ne secilin rast kur tentohet të rrezikohet shëndeti i qytetareve të vendit”, konsideron Lamir Thaçi, zyrtar nga Agjencia e Ushqimit dhe Veterinarisë.

 

Asgjësimi i kësaj sasie është realizuar në depon e mbeturinave ne Mitrovicë nën mbikëqyrjen e zyrtareve të MIK-ut.

---