Institucionet e dijes jashtë kthetrave të politikës*

Në institucionet tona pedagogike dhe ato të dijes duhet më në fund të fillojnë të mbretërojnë vlerate njëmendta dhe jo katapultimet politike dhe improvizimet

Emërimi i Ibrahim Gashit rektor i Universitetit të Prishtinës në kohën kur ai ushtronte funksione të larta politike, ndër të tjera edhe zëvendëministër i Punëve të Jashtme të Kosovës dhe nënkryetar i AKR-së, ishte një katapultim i tij i qartë nga politika. As sfondi i tij pedagogjik, e lëre më ai shkencor, as përvoja e tij si mësimdhënës universiteti e as aftësitë e tij drejtuese të institucineve pedagogjike nuk flisnin për një zgjedhje të duhur. E tëra fliste për atë se rektori ishte kalkulim i  koalicionit aktual qeveritar dhe nxjerrje koncesionesh të partisë së vogël të koalicionit. Natyrisht se nga rektori i katapultuar nga politika s’mund të priteshin vlera të reja e të larta etike përveçse ato të praktikuara nga ai dhe nga liderët e tij të politikës. Prandaj, rektori për të përforcuar titujt dhe pozitën e tij nuk ngurroi të botojë punime „shkencore“ në revista joshkencore, ashtu siç nuk nguronte shefi i tij i partisë të shpallte njohje të paqena të Kosovës si shtet, të cilat dikur i përligjte ish-zëdhënësi dhe ish-zëvendësi i tij poaq paturpësisht sa i shpallte ato shefi i tij i partisë.

 Nuk është vetëm rektori i katapultuar nga politika në universitete. Janë edhe shumë dekanë, prodekanë e mësimdhënës/e. Janë të shumtë ish – ministrat e zëvendësministrat e angazhuar sot në univesitetet publike dhe ato private të Kosovës, ku studentëve ju dërdëllisin patriotizëm e etikë pa pa pasur fare turp se si njërën ashtu edhe tjetrën i shkelin çdo ditë me të dyja këmbët.

Edhe ndaj tyre duhet filluar verifikimi dhe, në rast të manipulimeve, që duket të jenë evidente, të kërkohet shkarkimi dhe jo vetëm dorëheqja e tyre. I shkarkuar dhe jo i dorëhequr duhet të konsiderohet edhe ish-rektori Ibrahim Gashi, sepse ai dhe stafi i tij bënë cenime të rënda të detyrave të tyre. Ata me këto jovlera etike s’mund të ushtrojnë më as profesionin e mësimdhënësit e lëre më të drejtuesve të institucioneve pedagogjike dhe shkencore.

Edhe Akademai e Shkencave të Kosovës është e mbushur me gjithfarë politikanësh, me gjithfarë gjysmanalfabetësh, që s’mund ende të lexojnë rrjedhshëm e lëre më të shkruajnë kuptueshëm e pa gabime. Kam këu në radhë të parë parasysh “akademik” Isa Mustafën, kryetarin aktual të  LDK-së, icili për nga mënyra se si shprehet është tepër larg nivelit të  një gjimnazisti mesatar, e lëre më të një akademiku të mirëfilltë. Të ngjashëm – të padijshëm, legastenikë dhe pa vlera etike- janë edhe pretenduesit e PDK-së për anëtarë të Akdemisë – Ramë Vata, Ramë Buja (i doktoruar me temën e “Konferencës së Rambujesë”!, madje tek bashkëpartiaku i tij Enver Hoxhaj!!) , e ndonjë tjetër pretendues anonim, të cilët zhdërvjelltësi të vetme “akademike” e kanë intrigën.

Akademia duhet të jetë institucioni suprem i dijes dhe ppopulli duhet kërkojë llogari nga drejtuesit e Akademisë për projektet që kanë, për punën që bëjnë, për procedurat e emërimit, sepse ata financohen nga tatimpaguesit e Kosovës dhe, ndër të tjera, edhe për këtë aryse duhet t’u japin llogari atyre.

Po të gjurmosh në ueb-faqen e kësaj Akademie nuk gjen kurrfarë punimesh të shkarkuara që do t’i kishin hije një akademie të mirëfilltë. Po të shikosh në akademitë e popujve fqinjë gjen një sërë punimesh të të gjitha fushave, ndër të tjera edhe historike, ku kontestohet e kaluara jonë historike. Është kështu, sepse anëtarë të  shumtë të Akademisë janë të njohur vetëm nga politika dhe jo kurrsesi nga kontributi i tyre shkencor: Naxhat Daci, Sali Gashi, Arsim Bajrami …

Në institucionet tona pedagogike dhe ato të dijes duhet më në fund të fillojnë të mbretërojnë vlerate njëmendta dhe jo katapultimet politike dhe improvizimet.

Nexhmedin Gerguri  

* Opinionet e autorit nuk reflektojnë domosdoshmërisht mendimet e redaksisë